Dagang sabun Cecelia Lagak majak ngerembai

“Produk sabun ditempa aku empu ngena chap Cc Beauty ari taun 2015. Aku mega udah nguji ngaga sabun ari buah engkabang lalu asil iya manah amat.”

BINTULU: Dagang sabun majak ngerembai sereta mujur nempa makit iya empu dalam industri penganta di nengeri tu.

Peranak asal Kapit, Cecelia Lagak, 30 taun, ngeringka ati diri ngepunka dagang tu dalam taun 2013, nitihka singkang bala bukai.

Ku Cecelia, ngena chap dagang G & D Enterprise, tuju iya ukai semina deka mujur bedagang aja, tang mega ngemai bala komuniti kelebih agi raban indu bela ngembuan penemu ngaga sabun ari kereban asal baka madu, kupi, minyak engkabang enggau ke bukai.

“Aku berengkah ngajar ngaga sabun dalam taun 2017 pengudah negapka dagang diri lalu bisi puku dikena ngatur kelas tauka bengkel.

TULIN… Bemacham bansa produk dikeluar ngena chap Cc Beauty.

“Produk sabun ditempa aku empu ngena chap Cc Beauty ari taun 2015. Aku mega udah nguji ngaga sabun ari buah engkabang lalu asil iya manah amat,” ku Cecelia mantaika diri lantang ati.

Nya kebuah Cecelia keran matak mayuh agi bansa kitai ngaul diri ba pengawa ngaga sabun ti bisi pengulih dikemansang nyadi dagang besai jemah.

Ku iya, penemu dikunsi ukai semina pulaika pemaik bala penyereta aja, tang ulih nyaup nambahka belanja ruang bilik berengkah ari dagang mit.

“Tu ukai jaku tempa laban mayuh udah bala penyereta ti belajar ngaga sabun ari bengkel ke diatur mujur teulihka asil ari penemu nya.

“Sabun tu digaga ari buah asal enggau madu lalu nadai digulai enggau ai kimia ti tau nganu pengerai kulit enggau tubuh kitai.

TAU JARI… Cecelia landik ngaga langkar sabun nitihka peminta kemaya hari.

“Endang udah juluk aku ngambi bansa kitai bela angkat, sama maju ba dagang. Penemu tu munyi ku sempama, buah ubi laun dikali buruk di pun, buah empa laun diempa lunggar taun,” tandu iya.

Cecelia suah udah nerima peminta ngatur bengkel ngaga sabun kelebih agi di Bintulu ditu, enggau di Miri, Kuching sereta Sri Aman.

Bengkel tu diatur nengah kerejasama rat serakup indu enggau balai dagang di nengeri ti ngaul raban indu enggau indai tunggal.

Kitai meseti bedagang enggau ati lurus, rejeki mega deka gerah diulih laban ulah ti limpang deka ngerumpang pengandal orang ngagai kitai sereta tau mechahka periuk asi kitai empu.

“Sebarang pengawa dikereja ngena ati lurus deka mansutka asil ari berekat, kitai mega deka lantang ati.

BEKUNSI PENEMU… Cecelia (bediri, kiba) begulai enggau bala penyereta bengkel ngaga sabun di Sri Aman.

“Pia mega anang sanggu nguji ngaul diri ba dunya dagang,” ku Cecelia madah nyemetak.

Ngelansa pasal bengkel ti deka diatur dalam bulan Jun tu ila ku Cecelia, sida apin netapka endur enggau hari bulan taja udah nerima rintai nama penyereta, tebal agi ari raban indu Serakup Dayak Sarawak (PEDAS).

“Timbal diterima chukup manah lalu kami udah nerima rintai nama sida ke bisi ati ngulu bengkel tu ila.

“Aku endang rindu bekunsika penemu enggau peneleba diri, laban dagang tu bisi pasang surut iya, bisi maya kitai mujur bisi mega kitai tejanggal singkang, tang semua nya diambi nyadi peransang diri,” simpul iya.

Penerang enggau tanya silik pasal bengkel tauka produk sabun tau telefon nuju Cecelia empu ba lumur 016-844 1928.

KENANG… Bala penyereta bengkel diatur ba Balai Suarah Sri Aman begambar ungkup kenang enggau Cecelia (duduk tengah).

 

KEREJASAMA… Cecelia begulai enggau raban Balai Dagang di Kuching mujur ngatur bengkel ngaga sabun.

 

JAUH PEJALAI… Cecelia mega puh bekunsika penemu datai ke Miri.

 

KAMI UDAH… Sekeda ari penyereta bengkel ngaga sabun di Bintulu ti udah mujur ba dagang sabun diatu.

 

NARIT ATI… Bemacham langkar sabun ditempa Cecelia ari penau jari diri.