Daja kemiding untung RM200 sehari

KUCHING: Rindu bejual sayur babas ditemu likun diempa sereta nadai ngundan rachun ngasuh Kawin Sirat, 55 taun, ngemeranka dagang tu nyadika batang pengawa iya.

Penatai ari Sebangan Sebuyau, Kawin madahka diri rinduka pengawa bedaja tu kenyau ari empat taun ke udah, ditambah umur majak tuai sereta enda entu sikar ngereja pengawa berat agi.

“Enti suba, kereja ngangkut semin enggau pengawa berat bukai nya meh ditapat tang pengudah umur majak manggai, ba aku empu nadai lebih ari bedaja tu lantang dikereja.

“Bansa sayur didaja aku endang diambi ari babas ditu empu, ukai ditanam, baka kemiding, paku ikan, paku kubuk, tubu, batang bukau enggau ke bukai,” ku iya ngelansa.

Kawin ngelansa pengawa iya bedaja lebuh dirandau Suara Sarawak ba Tamu Emart Batu Kawa ditu, kemari.

LANTANG ATI BEDAJA… Kawin Sirat

Ku iya, asil diulih ari bedaja dia urung RM200 sehari lalu deka nambah maya ujung bulan.

“Ujung bulan tebal agi orang udah terima gaji lalu jam bebelika barang enggau lauk.

“Utai didaja aku chukup laku maya tu kelebih agi kemiding laban pupu bansa rinduka pemakai tu.

“Suah mega kemiding dijual aku diangkat taukey pak makai ditu, dataika 20 ikat.

Ku Kawin, sayur tu digiga iya empu sebelah babas sereta disaup anak enggau petunggal iya.

“Orang rindu belaukka daun babas laban nadai ngundan rachun sereta nyamai kelimpah rumpas chara mela.

“Taja pia, daun babas enda tan ditaruh lama, giga pagi lalu enda tau enda abis dijual muakka lemai laban iya deka layus enggau buruk,” ku iya.

Pia mega ku Kawin, daun babas enda sebaka enggau sayur ditanam laban endang tumbuh galak, enda ibuh disum enggau dirachun, nya kebuah tan sehari aja.

Kelimpah ari nya, Kawin mega bisi nyual sayur bukai baka changkuk manis, ensabi, daun rampu enggau sayur babas bukai.

“Asil ari bedaja chukup kena nambahka belanja kami sebilik nyengkaum uchu aku bisi 16 iku.

“Taja nasip kami bedaja tu bisi pasang surut tang aku pechaya rejeki siku-siku enda sama sereta ari berekat pengawa dikereja kitai besehari sehari.

“Kaul aku enggau bala bukai lebuh bedaja mega chukup rat sereta ulih bekelala enggau pupu bansa ti datai meli sayur,” ku iya seraya tuchum.

KEMERAH… Kawin nyuaka kemiding ti dibeli siku ari pengusung Tamu Emart Batu Kawah.

 

LAKU… Kawin mega bisi nyual paku ikan.