BETONG: Simposium Ngepan Iban deka diatur lalu dipenyadi dalam bulan Oktober taun tu, ku Adun Layar, Gerald Rentap Jabu.

“Simposium keterubah tu mega deka ngangauka bala menyadi kitai bansa Dayak ari Kapuas Ulu, datai kitu mandangka ngepan asal bansa kitai.

“Aku mega nemu kitai napi penanggul belanja ngatur simposium tu, nya kebuah agi ngelanggur kita, KNB bekerejasama enggau ejensi perintah baka Opis Residen Betong ngemujurka iya,” ku Gerald.

Gerald mansutka jaku tu beserimbai enggau Pengerami Bejadi Kelab Ngepan Betong 2019 apin lama ke udah.

Simposium tu ditibak ari penemu pengudah pejalai nemuai ngagai ex-Sapit Kepala Menteri Datuk Patinggi Alfred Jabu Numpang dalam taun nyin kemari.

BEKUNSI PENEMU… Ari kiba; Temenggong Nyanggau, Jua enggau Tuai Rumah Atan ari Desa Sadap di Kapuas Ulu ngarika DAD lebuh meda keresa bisi dipandang Edmond Rintai (kanan) ke ngempu Mijum Ulu Padeh.

Nitihka perambu asal, simposium diatur dalam bulan Mei tang ketegal KNB napi penekul ba pekara belanja ngujungka iya dilanjar ngagai Oktober.

Ngelansa pasal tusun pengawa udah diperambu raban KNB ungkup 2019, ku Chairman KNB, Tajem Sinok, 43 taun, bisi 20 bengkah program deka digulu enggau diatur sida.

Kenu ku Tajem, lebih kurang RM90,000 ungkus deka diguna ngemujur kesemua perambu nya lalu tu begunaka sukung semua raban kelebih agi ari ejensi enggau opis bekaul.

“Entara tusun pengawa diperambu baka ngulu pengerami makai lemai, program merarau, ngatur kelas main asal nyengkaum kelas ngajat enggau betabuh, kelas ngaga gagung, engkerimok enggau terabai, pengawa bejalai bebala mayuh ngerami Gawai Dayak renggat Bagi Menua enggau Nengeri.

“Kami mega udah merambu ngatur pejalai Ngabang Gawai Dayak di Sumpak Sengkuang di Indonesia enggau Pejalai Nemuai Budaya Ke Dewan Adat Dayak (DAD) Kapuas Ulu, Putussibau seraya ngedutka tanggam kaul begulai enggau bala menyadi kitai menua sepiak,” ku Tajem nerang.

BEJADI… Gerald dipebasa bejadika Kelab Ngepan Betong 2019.

Kelimpah ari nya, kelab deka ngatur Pekit Nyumpit Tebuka Trofi Datuk Amar Douglas 2019, Bejalai Matau Menua Kubu Panglima Rentap di Bukit Sadok, Betong Ke-7, Hari Begulai Diri Sebilik enggau Anugerah Carta Sapa Juara

Lagu Iban, ku peranak Selanjan Sebemban, Lachau Sri Aman nerang silik.

KNB mega bisi nerima kangau ngulu Pengerami Makai Lemai Nutup Kelas Ngajat Ranyai Gemilang enggau Program

Merarau Begulai Sejalai di Skim Skrang, ku Tajem nampung.

Ngelansa pasal pengawa sida sehari nya, Tajem temegah ati enggau meri tabi puji Gerald ti ulih limpang begulai enggau peranak Betong datai ngulu pengawa sida.

MAIN ASAL… Raban KNB mega bisi mantaika pengelandik sida betabuh ngena kereban muzik asal kitai Iban.

“Kitai lantang amat ati nerima penatai bala temuai nyengkaum pengabang chukup dipebasa kitai, Gerald Rentap ti dikangau bejadi pengawa sehari tu.

“Ngena awak tu mega aku ngarika kaban kelab bukai meri besai terima kasih ngagai semua kelebih agi Residen Betong, Friday Belik laban udah meri sukung penuh ngagai pengawa kitai sehari tu,” ku Tajem.

Pengari DAD Kapuas Ulu Indonesia Temenggong Nyanggau, Temenggong Richard Mulok, Sekretari Kaunsil Pelilih Betong Charlie Keling, Direktor Opis Pengerai Betong Dr Johnny Pangkas, pengari ari SIDS Betong, Serakup Tuai Rumah N36 Layar, Serakup Ketuai Raban Bansa Bagi Menua Betong, SDNU Engkilili enggau bala ketuai opis sereta bala bukai bela datai ngulu pengawa sida.