Deriba parai, bakih idup ba penusah bebadi kediri

BINTULU: Siku lelaki bebadi nyawa ba penusah bebadi kediri di jalai pengudah tepekul dalam kerita ba Simpang Bakun, Jalai Bintulu-Miri, ditu.

Ketuai Opis Bomba enggau Penyah Penusah (BBP) Bintulu Mohamad Meramit madahka seraban bomba ari BBP Bintulu berumban ngesah penusah nya pengudah nerima kangau ngenyit urung pukul 1.26 dini hari tadi.

Ku Mohamad Meramit, penusah bebadi tu nyadi ngaul sebuah kerita Proton Saga ditepan dua lelaki ke alai deriba kerita nya tepekul seraya bakih iya diripot idup.

Piak bomba mujur mansutka bangkai niang Muhammad Badrun Amin Abdullah, 39 taun, ti tepekul dalam kerita.

“Taja pia, lelaki nya ditukuka raban perubat parai tekala nya endur penusah nyadi lalu udah diserah ngagai polis.

“Kebuah penusah tu nyadi agi dipansik polis,” ku iya nerang.

Nambahka nya ku iya, pengawa meresi jalai mega bisi dipejalai dikena muai minyak ke naya ketegal penusah bebadi nya.

Operasyen ngetu urung pukul 3.07 dini hari pengudah pengawa meresi tembu.

TEPEKUL… Raban perubat meresa siku lelaki ti balat bakal ba penusah bebadi jalai alun dini hari tadi.

Suara Sarawak