Diatu endang jam patut nulung pangan diri

SARATOK: Bisi 39 iku Tuai Bilik (KIR) diasuh nitihka Atur Mindah Betagang Dipekul (PKPD) ba Rumah Mulok Seliman, Klua ditu udah nerima bantu barang pemakai ari Serikat Lee Chai Teng (LCT) Sdn.Bhd kemari.

Tauke (LCT), Lee Chai Teng madah, sida udah nganjung barang pemakai rangkai baka beras, gula, kupi, enggau ke bukai pengudah nerima peminta ari Tr. Mulok.

“Arapka bantu ari kami tu ulih ngelempungka tating penusah sida ke benung PKPD. Tu endang maya kitai patung nulung pangan diri ke tusah enda ngira sapa sida.

“Sapa aja tusah endang patut ditulung. Pengidup sempama baka jarum jam semampai bepusin, bisi maya di atas (senang) lalu bisi maya dibaruh (tusah),”ku iya.

Lee madah munyi nya ngagai Ruai, Suara Sarawak pengudah tembu nganjung barang pemakai ngagai Rh Mulok, Klua lemai ensana.

Bantu tu dianjung nitihka pemisi kami laban kasih ke sida ke benung diasuh PKPD.

“Arapka sida lantang ati nerima bantu nya. Besampi mega awakka semua sida seruran likun tauka dijuah ari pengerekai Covid 19,”ku iya.

Berebak enggau nya, TR Mulok meri terima kasih ngagai serikat LCT laban udah datai nganjung barang pemakai ke guna sida serumah sekumbang atur bepekul. Sida serumah diasuh PKPD, berengkah 12 nyentuk 25 Julai tu.

Suara Sarawak