KUCHING: Perintah Sarawak nengah Opis Premier numbuhka dua unit baru iya nya Unit Transfomasyen enggau Inovasyen Sarawak sereta Unit Digitalisasyen Servis Perintah Sarawak.
Premier Datuk Patinggi Tan Sri Abang Johari Tun Openg madah, pekara nya seraris enggau peminta Perintah Sarawak ngerandang pekara digital dalam sektor perintah Sarawak.
“Kami ngesan tanggungpengawa bejalaika polisi terus mai pengelantang, ubah positif sereta inovasyen ba bemacham pekara nipakka ubah dunya dikena nyamin pemansang Sarawak ti dikesayau,” ku iya.
Abang Johari mansutka jaku nya ba Majlis Sekalung Budi 2023 di Palan Aum Borneo Kuching (BCCK), malam Hari Minggu tu tadi.
Berebak enggau nya, iya ngansak semua staf Perintah Sarawak semampai belematika pemansang teknologi enggau nitih gaya dunya ti berubah ninting taun.
Abang Johari nyemetak madah, tu nentuka servis Perintah Sarawak ulih meruan meri kualiti servis ba tikas pemadu manah.
“Dikena nyikap Sarawak maju ba Ekonomi Digital Nengeri (SDE), kitai meseti bekerejasama rat, enti enda kering enggau lebih pintar dikena ngemansang semua infrastruktur digital ti diguna enggau nyendia palan ti engkeman bejalaika ekonomi digital penuh enggau likun, dijamin sereta chara ti ulih dipechaya,” ku iya.
Kelimpah ari nya, Abang Johari madah, rambai jaku Segulai Sejalai ti diaku Menteri Besai, Datuk Seri Anwar Ibrahim mega mandangka penau orang gawa perintah entara opis menteri tauka ejensi di Sarawak enggau Perintah Besai.






