DIPANDANG BARU
PENGUDAH tiga taun dipandang, diatu mayuh endar peminta mandangka baru filem tu.
Pengawa mandangka baru filem nya diatur ba timpuh ti chukup engkeman nentuka kitai ulih ngingatka baru pengawa asal sereta ngerapit kaul entara urat budaya enggau pesaka asal kitai.
Ku penerang nya, sida meri terima kasih ngagai bakih strategik ti ngemujur projek tu kelebih agi Opis Muzium Sarawak ti udah nyadi bakih kunsi kami nyukung pengawa mandang filem kedua kali tu.
“Jaku terima kasih khas dituju ngagai pemelanja rasmi kami, W T K Holdings Berhad ke sida ti besai reti begulai enggau Ta Ann Group, pemelanja bukai sereta KUPIKUPI FM ti nyadi bakih media rasmi kami.
“Semua kerejasama tu beguna amat dikena ngemujur pengawa mandang Filem Dokumentari Gawai Antu ti deka diatur pengelama enam hari.
“Nengah kerejasama tu, kami ngarap ulih nempa siti pelasar beguna ngambi bekunsi enggau nyaga pesaka budaya asal kitai kelai bebasa ke pengelain dikembuan kitai.
“Kami ngarap cherita enggau adat asal kitai deka terus mansang, idup enggau enda punas disegang arus jeman. Filem tu meri peluang ngagai serap komuniti mereti pemesai guna Gawai Antu. Pengawa baka tu mega marit rebak biak nyaga manah pesaka asal kitai ti nyadi identiti bansa lalu ditampung rebak dudi.
Raban indu mega ngembuan besai guna ba pengawa nyaga budaya lalu nyadi chunto ngagai rebak biak ba pengawa nyaga enggau nampung tradisyen tu.
Sepanjai dipandang enam hari, indu rumah panjai ari Rumah Gensurai, Layar, Betong mega deka datai enggau meri sukung ba Muzium Budaya Borneo. Raban indu nya temegah ngari ke rumah panjai sida dikena ngidupka baru semangat Gawai Antu.
Tu mega peluang sida berandau enggau mensia mayuh lalu bekunsi peneleba.
Ke penerang, Filem Dokumentari Gawai Antu deka dipandang pengelama enam hari belabuh ari 19 ngagai 24 Oktober tu ari pukul 11 pagi nyentuk 12 tengah hari enggau pukul 2 nyentuk 3 lemai ba Auditorium, Aras Bawah, Muzium Budaya Borneo.
Pengudah pengawa mandang filem keterubah nya kena 19 Oktober tu, siti sesyen bekunsi penemu enggau aum pemberita deka diatur begulai enggau Produser Eksekutif, Barbara Dubah Jabu begulai enggau Produser ti mega Direktor Filem Dokumentari Gawai Antu, Loo Shun Ming.
Sida deka meri penemu enggau penerang pasal budaya sereta pemesai guna nyaga pesaka asal baka ti dirikod dalam dokumentari tu.
“Gawai Antu tu ngelui ari pengerami. Tu siti chara kitai ngingatka penatai asal diri empu. “Tu mega chara kitai bebasa ke sida ti udah layu sulai seraya ngidupka budaya,” terang Barbara. Sesyen tu dikena nerang lenak agi pemesai reti Gawai Antu dikena ngintu identiti komuniti asal ba tengah arus urbanisasyen.
Nengah randau, bekunsi cherita sereta berandau enggau komuniti, pengawa tu dikearap ulih ngidupka pengelain budaya Malaysia ba pengidup kitai beseharisehari.
Penerang silik tauka tanya bukai, mensia mayuh tau ngerandau Produser Eksekutif, Barbara Dubah Jabu ba lumur 017- 8081877 tauka email, barbara.jabu@ gmail.com enggau Jacqueline David ba lumur 016-8546251 tauka email, jacquelineradoidavid@gmail.com.
