KUCHING: Tikas dividen Turu Pengereja Pengawa (KWSP) ungkup pekara wang kemaya hari disadang entara 5.5 nynetuk 6.3 peratus ti disungkak penyulut pengawa beranak puku ti manah kelebih agi ari makit ekuiti.
Pengelicha Kanan Fakulti Ekonomi, Dagang enggau Pekara Akauntan, Kolej Universiti i-CATS, Profesor Madya Dr Abu Sofian Yaacob madah, taja pen KWSP bedau mantai tikas dividen rasmi ungkup taun tu tang penyulut asi beranak puku nambah naka suku keterubah taun 2025 ulih meri kelai positif ngagai tikas dividen ujung taun.
“Pelaba tikas dividen ba taun tu engka entara 5.5 nyentuk 6.3 peratus bepanggai ba penyulut makit global, domestik enggau beranak puku KWSP.
“Dividen KWSP pemadu baru ba taun 2024 udah ditesau ba tikas 6.30 peratus ungkup kededua akaun Simpan Konvensional enggau Simpan Syariah.
“Tikas nya tinggi agi enti dibanding berapa tuan sebedau nya lalu diaku tegap ba gaya ekonomi global ti bedau tegap,” ku iya lebuh dirandau pemberita ditu, kemari.
Iya madah, tikas inflasyen ti tinggi ulih ngeruga asil beranak puku KWSP ti amat.
“KWSP nyelinting asil ti tinggi agi ari inflasyen dikena nentu duit simpan kaban enda diseruga ari sukut kuasa beli timpuh panjai.
“Nya alai, inflasyen ti enda tentu tauka nurun deka mantu nambah margin asil ti amat lalu nyukung asil dividen ti tinggi agi,” terang iya.
Ngenang silik, ku iya, Malaysia melaba pengerembai ekonomi meruan disungkak peminta domestik, beranak puku enggau eksport ti nyukung penyulut makit modal enggau asil beranak puku KWSP.
“Pemansang ekonomi ti tegap deka nambah pengandal bala pemeranak puku sereta nambah aktiviti korporat kelimpah meri asil ti positif ungkup aset ekuiti enggau bon,” ku iya.
Tampung iya, asil beranak puku KWSP balat ditentu penyulut makit ekuiti global enggau domestik laban tebal agi aset sida diperanakka ba saham enggau instrumen bekaul.
“Makit ti niki, ambi ke chunto, saham ti tegap nambah penatai pemisi pengawa beranak puku sereta ngemanah prospek dividen tang makit ti enda tentu baka penanggul geopolitik tauka perang dagang ulih nurunka asil.
“Bepelasarka penyulut suku keterubah 2025, penatai pengawa beranak puku KWSP nambah enti dibanding ba taun sebedau nya kelebih agi ari sukut ekuiti ti mantu nyukung prospek dividen ti manah,” ku iya.
Tampung iya, strategi beranak puku KWSP bela meri empas terus ngagai tikas dividen laban KWSP chakah ngatur aset sida nengah strategi alokasi aset (SAA) enggau diversifikasyen portfolio ti mantu nyemela risiko enggau asil.
“KWSP ngemayuh aset ti mungkur saham, bon perintah, reta tanah enggau ekuiti peribit kelimpah ngemerat penatai pemisi tegap ari instrument penatai pemisi tetap dikena ngurang nurun niki makit.
“Pia mega, pengawa ngatur risiko masit global enggau domestik bela meri empas ngagai penegap asil,” terang iya.
Nya alai, iya nyemetak madah, strategi ti dinamik agi enggau sebela ulih nambah asil beranak puku ti ulih meri empas positif ngagai tikas dividen.
“Tang strategi ti defensif agi ba makit ti lemi ulih ngetan dividen tang ngurang tikas dividen niki.
“KWSP mega madah, pelasar beranak puku sida ti bemacham meri pemaik ngagai sida bulih peluang seraya ngatur risiko dikena nentu mayar dividen ti meruan enggau tegap ba tengah makit ti enda tentu,” ku iya.
Ungkup rikod, KWSP ngerikod penyampau penatai pemisi beranak puku sepenyampau RM63.99 bilion ungkup timpuh semilan bulan ti beujung ba 30 September 2025, iya nya nambah 11 eratus ari RM57.57 bilion ti dirikod ba timpuh sebala ba taun tu tadi.
Penyampau penatai pemisi beranak puku ba suku ketiga 2025 sepenyampau RM25.07 bilion niki 27 peratus ari RM19.67 bilion ba suku ketiga 2024.
Ekuiti mengkang nyadi penyungkak besai ngagai penatai pemisi beranak puku suku ketiga 2025 ti meri RM16.95 bilion tauka 68 peratus ngagai penyampau penatai pemisi beranak puku nya.






