KUCHING: Perintah Sarawak benung ransing ngadu pengawa mai pulai dokumen sejarah menua tu ari Muzium British di London, nyengkaum dokumen enggau sempekat lama.
Premier sarawak, Datuk Patinggi Tan Sri Abang Johari Tun Openg madah, pengawa nya ngaul kerejasama raban muzium nya dikena ngulihka salin chelak ngambi dibai pulai lalu ditaruh di Sarawak.
“Tu ngaul sekeda bup enggau sempekat. Lebuh aku ngetuai ke diligit ke United Kingdom enggau nemuai ngagai muzium di London, kami bisi meda mayuh dokumen bekaul Sarawak ti nadai dikembuankitai ditu.
“Dokumen nya ukai semina bekaul Sempekat Malaysia 1963 (MA63) aja, tang nyerangkung surat beguna ari jeman perintah kolonial, jeman sebedau Malaysia ditumbuh enggau lebuh Sarawak dipegai Sultan Brunei,” ku iya.
Abang Johari nyebut pekara nya lebuh dirandau pengudah ngatur pejalai ngabas projek arkib nengeri nya ba Pustaka Negeri Sarawak di Petra Jaya ensanus.
Ngenang silik agi, iya madah ke pengawa mai pulai dokumen sejarah nya mega nyengkaum dokumen asal enggau salin ti diaku (certified copy) raban muzium enggau muzium British.
“Enti dokumen asal nadai, kitai tetap ulih mai salin ti udah diaku raban bekuasa din.
Salin dokumen tu sebaka enggau dokumen asal lalu deka ditaruh teguh di Sarawak,” ku iya.
Iya mega madah, entara dokumen ti bisi ditemu ba British Museum nyengkaum dokumen bekaul naturalis British, Alfred Russel Wallace (ti tampak enggau tetemuka teori evolusyen ba jeman ekspedisyen ke Alam Melayu nyengkaum Sarawak ba jeman ke-19) enggau dibantu siku nembiak Melayu benama Ali (pemantu Wallace sekumbang ekspedisyen nya).
“Ali nya ngumpul spesimen dikena nyukung teori evolusyen ti udah nya meri penemu ngagai Charles Darwin. “Kitai mega udah ngulihka dokumen bekaul pangku pengawa Ali, nyengkaum siti dokumen ti dikumbai ‘Sarawak Law’,” terang iya. Abang Johari mega nerang, undangundang Sarawak ti dipejalaika Wallace di Simunjan bisi kaul enggau dokumen kesulai (butterflies).
Nya alai ku iya, bisi mayuh dokumen bekaul Sarawak diatu bisi ba London, lalu ditaruh tegut ba endur ti embap, gaya penyelap enggau pengangat dijaga terit nentuka kualiti dokumen nya enda mudah luya tauka retai.
“Begunan arkib ti didiri kitai ila mega deka disikap sistem nyaga pengangat enggau penyelap sereta embap.
“Aku pechaya, kitai deka bisi entara perengkaguna arkib pemadu moden ba rantau tu,” ku iya nyemetak. SITI NURAIN RATANI
