SIMANGGANG: Dua gerija di sitak Kunsil Nengeri (DUN) Simanggang nerima geran Unit Pekara Pengarap Bukai (UNIFOR) penyampau RM1 juta dikena ngadu enggau nambahka fasiliti rumah sembiang.
Nitih penerang, Catholic Church Of Our Lady, Queen of Peace, Sri Aman nerima geran sepenyampau RM800,000 bagi dikena ngadu struktur begunan enggau fasiliti.
Seraya Sing Eng Methodist Church nerima RM200,000 dikena ngadu enggau ngemanahka rumah sembiang.
Sapit Menteri Pelajar, Inovasyen enggau Pemansang Pengelandik Sarawak ke mega Kaban Kunsil Nengeri (ADUN) Simanggang, Datuk Francis Harden Hollis madah, geran UNIFOR nya diberi nyadi sebagi ari inisiatif Perintah Sarawak nentuka pengelantang rayat pupu pengarap enggau raban bansa ba nengeri tu dijaga belama.
“Kelimpah ari nya, tuju geran nya mega nyendiaka fasiliti ke meruan agi ungkup aktiviti komuniti di Sarawak.
“Nya alai, arap ke geran UNIFOR ke diberi tu deka mantu kededua gerjija nya ngadu rumah sembiang sida ke pengelantang raban nya dudi hari,” ku iya.
Iya madah munyi nya nengah teks jaku dibacha pengari iya, Philip Foster Hollis ba siti pengawa rumpas diatur ba Palan Servis ADUN Simanggang, ditu Hari Satu.
Iya mega madah, tuju belanja nya dikena nambahka infrastruktur rumah sembiang ukai Islam lalu nentuka rampa ke likun, lantang enggau genap agi ungkup dikena raban dia enggau aktiviti komuniti. — EDISI UKAS
