BELAGA: Bisi 26 penyereta ari Uma Juman Edaberan, Sungai Koyan Asap, Belaga mujur numbuka Program Pemansang Dagang Kraf.
Program tu mungkur tiga batang komponen iya nya Business Engagement Session, Woksyop Marik sepengelama dua hari sereta Program Latih Digital enggau Media Rama.
Pia mega, program ti diatur RabenBeads Enterprise nengah kerejasama sereta sukung wang turu ari Malaysia MADANI begulai Kaunsil Kraf Sarawak (SCC) nya nyadi pengeransing dikena ngenegapka komuniti kraf sereta ngansah pengelandik dagang ba bala penyereta.
Program randau nya nyadi pelasar ngagai penyereta bekunsika peneleba, pemar enggau utai ti diguna dalam bidang kraf jari, kelimpah ari nempa kaul entara komuniti nengah pejalai program.
“Pengudah program randau, kami belabuh ngatur Woksyop Marik sepengelama dua hari dikena ngajar teknik nusuk marik.
“Bala penyereta diberi latih praktikal ngasilka asil marik enggau chara ngadu motif asal nyadi produk kraf ti ngembuan rega estetik enggau pengulih makit,” ku Danielle Lipang Lawai, siku pengajar ari RabenBeads Enterprise.
Nengah saup saup ari Julia Livan Talek ari Edaberan Enterprise raban penyereta mega diajar ngasilka produk, ngelala pasal ungkus pemun sereta meratika rega produk ti udah tembu.
Pekara tu beguna dikena mantu sida meretika ungkus kereban, pengereja pengawa enggau pekara ti bekaul nentuka rega jual ti engkeman sereta nentuka produk ti diasilka ngembuan rega ekonomi.
Tusun kepenudi program nya ditangkan Latih Digital enggau Media Rama, mungkur pemun makit digital, ngasilka isi, ngambi gambar produk ngrena telefon pintar sereta ngrena pelasar media rama dalam ngelaku asil pengelandik jari sida.
Raban pengatur madahka semua 26 penyereta mujur numbuka semua tiga program nya ti mandangka komitmen komuniti Uma Juman ngangkatka pengelandik sereta nyerungkai asil pengelandik jari nyadi bidang dagang ti berega.
Nengah program tu, penyereta ukai semina bulih pengelandik ngasilka produk kraf jari, tang mega bulih bungkur ngagai sukut ti beguna dalam ngatur sereta ngelakuka produk.
Inisiatif tu dikearapka ulih mantu ngenegapka komuniti kraf menua tu, nambahka peluang mansutka penatai pemisi sereta nentuka pengelandik enggau pesaka asal kraf jari terus ditan, dikemansang sereta berega nitih ke peminta makit kemaya hari.
