Dua melaki bini bebadi nyawa, kerita tepawah ke parung

SERIAN: Laki bini bebadi nyawa pengudah kerita seduai tepawah ke parung di Kilometer 77 Jalai Kuching-Serian urung pukul 9.30 malam tadi.

Ku Ketuai Polis Daerah Serian Deputi Superintendan Aswandy Anis, seduai tu beumur 35 enggau 37 taun ngena kerita Proton Saga FLX dipelaba ba rantau jalai mansang ke Serian.

“Seduai ditukuka bala perubat ari Sepital Serian parai tekala nya ba penusah nyadi,” ku iya nerang.

Aswandy madahka bangkai seduai mega udah dibai ngagai Sepital Serian ngambika dipansik.

Iya mega madahka kes tu agi dipansik nitihka Seksyen 41(1) Akta Pengangkutan Jalan Raya.

SINU… Gaya pediau kerita nabanka nyawa laki bini ba penusah bebadi di Kilometer 77 Jalai Kuching-Serian, malam tadi.