Dua nembiak tepekul dalam lif selamat

KUCHING: Dua iku nembiak indu beumur 10 taun tepekul dalam lif begunan Gerempung Gereja Sarawak (ACS) di Jalai Ang Cheng Ho ditu, ensanus.

Komander Operasyen Opis Penyerara Api enggau Penyah Penusah (JBPM) Batu Lintang PBK II Jemiran Kemis madah sida nerima kangau penusah nya jam 9.16 malam.

“Pengudah pengawa ngesah dipejalai, dia kami meda dua iku nembiak indu tepekul dalam lif nya.

“Kami lalu ngangauka raban teknikal begunan nya ngambika ulih mai kunchi lif,” ku iya madah ba siti penerang.

Taja pia pengudah nganti ba pengelama 20 minit, raban teknikal nya apin datai lalu dua iku nembiak nya majak kesal ati sereta enda ulih diaum raban bomba.

“Siku ari nembiak indu nya bisi sakit ampus lalu mejal kami berumban nyelamatka seduai ari lif nya.

“Kami lalu ngaga pemutus muka pintu lif ngena ‘spreader’ tauka perengka khas,” ku iya.

Jemiran madahka dua iku nembiak nya mujur dipansutka ari lif nya lalu nadai penusah bebadi tauka telih nyadi rambau pengawa nyelamat nya dipejalai.

Nembiak ti bisi sakit ampus nya mega mujur diaum sereta dibai betemu enggau sida sebilik lalu operasyen nyelamat tembu jam 9.49 malam.

NYELAMAT… Raban bomba nguji muka pintu lif begunan ACS ba operasyen nyelamatka dua iku nembiak indu ke tepekul dalam nya.

Suara Sarawak