ISABELLA INCHANG
suarasarawak.sv@gmail.com
KAPIT: Peranak Rumah Tang Siput, Nanga Banyau, Baleh Kapit berasai gaga enggau lantang ati pengudah dua projek dikemendar ungkup pengelantang sida.
Menteri Kereja Raya ti mega Kaban Parlimen Kapit, Datuk Seri Alexander Nanta Linggi madah, dua projek ti dikemendar iya nya projek sistem parit enggau sungap atap ungkup peranak Rumah Tang.
Iya ngelawa Rumah Tang begulai enggau bala bukai ngambi matau penyikap Palan Penyangkai Kedua ungkup penyereta Safari Rakit Baleh – Kapit 2025.
“Ba pejalai ngundang peranak Rumah Tang, sida udah besikap manah lalu gagit ngemujur program ti udah nyadi program ninting taun di Kapit nya ila.
“Tuju aku ngundang sida kitu berindik ari enda ulih ngulu pengawa nya kena 12 Julai (sehari tu) laban bisi pengawa ke enda ulih diseliah,” terang iya.
Kelimpah ari nya, Nanta mega muji Tuai Rumah Tang laban pintar merambu pemansang ba sitak nya seraya ulih bekerejasama rat enggau pegawai ejensi sereta opis perintah.
Nya alai, iya nyemetak madah ke kerejasama baka tu beguna endar nentuka semua rayat ampit buah pemansang.
