Dua ukui ba Rh Adeng, Samueh ditemu positif rabies

KUCHING: Rumah Adeng, Samueh di Engkilili diatu dipadahka sitak baru bisi rabies pengudah Opis Servis Veterinar Sarawak (DVS) tetemuka dua iku ukui positif rabies.

Rumah panja nya diatu ba luar radius 10 kilometer ari sebarang sitak ke dirampit igi rabies.

Sapit Kepala Menteri Datuk Amar Douglas Uggah madah, rumah panjai nya endang entara enam sitak ke dipadah kandang menua dirampit igi penyakit rabies ba nengeri tu.

“Tu nyengkaum sitak Kampung Seroban di Serian, Kin Chu Shin di Batu Kawa, Kampung Siantan di Serian, Tanjung Durian di Seniawan Bau enggau Kesuma Resort Petra Jaya,” ku iya.

Uggah ke mega Chairman Komiti Pengatur Penusah Ngenyit Nengeri madah, Makmal DVS udah ngaga pansik apin lama ke udah ungkup 14 sampel ari Kuching, Serian, Bintulu, Kapit enggau Sri Aman berengkah 5 nyentuk 12 Julai.

“Enam ari sampel ke dipansik nya ari sitak bekaul nyengkaum rumah panjai ke bisi positif Rabies.

“Udah nya, sampel ari Bintulu enggau Kapit ditemu negatif,” ku iya.

Berebak enggau nya, Uggah ngasuh orang ke beempu ukui minta vaksin enggau lengkas.

Ku iya, sida ke beempu ukui ari Rumah Adeng, Samueh enggai ngemendarka raban vaksin nuchuk ukui sida taun siti nyin kemari.

“Sida ngelalaika ukui maya raban ari DVS datai ke rumah panjai ungkup operasyen vaksin.

“Sida takut ukui nya mati nyema udah dituchuk vaksin,” ku Uggah seraya madah naka tu nadai ukui mati pengudah dituchuk vaksin.

Iya madah, ukui ari Rh Adeng, ditemu bisi rabies pengudah ngetup orang.

“Lima fasa operasyen anti rabies ke dipejalai setengah ba selampur negeri deka dipejalai bari berengkah 31 Julai nyentuk 3 Ogos ila, nyengkaum ba pelilih Sri Aman, Lubok Antu enggau Betong.

“Aku ngelalau sida ke bisi ukui ba sitak tu anang enggai ngasuh ukui diberi vaksin.

“Beri kerjasama ngagai piak kami laban meseti nemu rabies sebansa penyakit ke ulih munuh nyawa,” ku iya.

Kenu ku Direktor DVS Dr Adrian Ambud Susin, urung 63 sitak diatu udah dipadah nyadi sitak dirampit rabies kenyau taun 2017 di nengeri tu.