TENTU kita enda kala ninga kelingai Mentawai laban kelingai tu semina bisi dikembuan peranak asal di Indonesia.
Ungkup penerang, kelingai Mentawai tu ukir asal ari menua Indonesia ti disebut sida ‘Ti’ti Mentawai.
Ukir nya bebida ari ukir ‘Sikerei’, sebansa ukir lama sebedau ukir Mentawai Shaman tauka ukir ti ditanka peranak asal ari Pulau Siberut, Mentawai, Indonesia.

Ukir nya mega bebida ari kelingai Dayak di Borneo laban mit agi, bejarit sereta alus.
Siku artis kelingai Dayak enggau Mentawai ari menua Indonesia, Durga Sipatiti madahka iya belajar ngaga kelingai nya dua dekad suba.
“Aku diau ba sebuah mengeri iya nya Yogyakarta, Indonesia sebuah mengeri di Pulau Jawa tauka ba selatan Borneo.
“Aku diau dia laban Yogyakarta tu diaku nyadi mengeri main asal enggau adat Indonesia,” ku iya lebuh dirandau Suara Sarawak rambau ngulu Ekspo Kelingai Antarabansa Kuching 2024 kena 5 nyentuk 7 April tu tadi.
Ku Durga, iya belajar ngaga kelingai ba serata menua kelebih agi ba Kalimantan, Mentawai, California, Eropah enggau ke bukai.
“Aku empu enda nemu nama kebuah aku rindu meda kelingai lalu rindu bekelingai.
“Tang, aku ulih madahka pengawa bekelingai tu udah nyadi gaya pengidup aku.
“Diatu kelingai nyadi pengawa aku, nyadi pun penatai pemisi tauka belanja kami sebilik.
‘Ukai semina nya aja, ari pengangkun tu mega aku ulih mekuh pengawa asal iya nya pengawa bekelingai tu,” ku iya.
SUKUNG TEGUH
Ku iya, ruang bilik mega nyukung pengawa tu laban seagi iya meri belanja ngagai apai indai, bini enggau anak, sida enda kala nagang iya bejalaika pengawa ngaga kelingai.
Nya ngujungka Durga mujur muka sebuah kedai kelingai ti dikumbai Durga Tattoo ba Jakarta sebedau iya muka sebuah agi kedai kelingai di Yogyakarta.
Iya udah nya lalu muka sebuah agi kedai Durga Tattoo di Berlin, Jerman tang kedai nya enda lama semina ungkup timpuh tiga taun aja iya nya ba taun 2019 nyentuk 2021.

Diatu, Durga agi chakah bejalaika pengawa ngaga kelingai ba Yogyakarta kelimpah ngulu sekeda program bekelingai ti bisi diatur ba serata dunya.
Ku iya, pejalai nyadi siku pengemeran kelingai nya ukai pekara ti muntang, iya mayuh napi penguji dalam ngetanka kelingai asal nya.
“Baka napi alun gelumbang, aku sanggup begadai nyawa ngetanka kelingai asal tu, nya ukai pekara ti senang, mayuh pekara ti ditinggalka aku ketegal tu.
“Biar meh nya nyadi resia aku empu, pedis deka nusi ke kita rebak baru diatu laban pekara nya mar ditusi sereta dikunsi,” ku iya.
MAYUH PEJALAI
Ku Durga, Ekspo Kelingai Antarabansa Kuching 2024 patut diatur suah agi ngambika ulih ngetanka main asal enggau adat semua bansa.
“Tu program ti manah, dalam ngetanka main asal enggau adat kitai, program baka tu meseti diatur suah agi.
“Nya deka mai bala nembiak rebak baru meda bida bungai kelingai, nama enggau kelai semua bansa ti bisi di dunya tu,” ku iya.
Sekumbang dua dekad dalam dunya seni nya, Durga mayuh dikaul enggau sekeda program pemandang di Indonesia.
Nya nyengkaum, muzikal Bawi Lamus ba Jakarta ti nyerita pasal bansa Dayak Ngaju di Borneo.
Kelimpah ari nya, iya mega kala dikangau mandangka pengawa kelingai di London enggau dikangau tama dalam dokumentari ‘Mentawai Tattoo Revival’ tusun satu enggau tusun dua.
Iya mega udah bejalai ngagai serata dunya ba pengawa pemandang kelingai Mentawai baka ngagai Sarawak, Belgium, Netherland, Perancis, Sweden enggau Itali.
Iya mega udah bejalai ngagai Poland, Switzerland, Jerman, Austria, South Pacific, United Kingdom, Sepanyol, Finland enggau California.






