Eksport produk kayu ramu nurun

KUCHING: Eksport produk kayu ramu Sarawak nurun 12 peratus berengkah ari bulan Januari ngagai September taun tu dibanding timpuh ti sama taun siti nyin kemari.

Sapit Kepala Menteri enggau Menteri Dagang Entarabansa enggau Industri enggau Pemansang Dagang, Datuk Amar Awang Tengah Ali Hasan madahka tu nitihka penyampau eksport produk kayu ramu Sarawak ari bulan Januari ngagai September taun tu ti manggai RM3.5 bilion.

“Penyampau tu nurun 12 peratus dalam taun 2019 enti dibanding enggau rega eksport RM4 billion dalam tiga suku keterubah taun 2018,” ku iya pengudah bejadi Hari Integriti Kaunsil Pemansang Kayu Ramu Sarawak (Pusaka) 2019 ba Dewan Seminar Pusaka, ditu ensanus.

Pengawa tu digulu Menteri ba Opis Kepala Menteri (Integriti enggau Ombudsmen) Datuk Talib Zulpilip, Menteri Muda Pemansang Dagang enggau Dagang Mit enggau Jelan Pemesai (PKS) Datuk Mohd Naroden Majais enggau Menteri Muda Perambu Mengeri, Pengatur Tanah enggau Rampa Menua Datuk Len Talif Salleh.

Awang Tengah madah, eksport produk kayu ramu Sarawak nurun taun tu ketegal penanggul ekonomi dunya majak nurun ditambah penanggul pemansut kayu ari kampung majak nurun.

“Papan lapis nyadi pemun produk kayu ramu ti dieksport menua tu lalu rega eksport nya berengkah ari bulan Januari-September taun tu penyampau RM1.8 bilion,” ku Awang.

Taja pia, 21 peratus dibanding RM2.2 billion penyampau eksport papan lapis ari menua tu dirikodka dalam timpuh taun nyin kemari.

Ku iya, papan lapis nya nyengkaum 51 peratus ari pemun kayu ramu dieksport Sarawak ari bulan Januari ngagai September taun tu enggau produk bukai iya nya kayu batang penyampau RM547 juta (16 peratus), kayu gergaji penyampau RM451 juta (13 peratus), papan gentian penyampau RM264 juta (7 peratus) enggau venir penyampau RM72 juta (2 peratus).

“Jipun mengkang nyadi makit produk kayu ramu Sarawak. Penyampau eksport ngagai Jepun dalam bulan Januari-September 2019 iya nya RM1.7 bilion,” terang iya.

Iya madahka penyampau tu nurun 13 peratus enti dibanding penyampau eksport nya penyampau RM1.9 bilion dalam taun Januari-September 2018.

Tengah madahka eksport ngagai Jipun nyengkaum 48 peratus produk kayu ramu menua berengkah bulan Januari ngagai September enggau nyadi entara lima menua makit besai ungkup eksport nya.

Entara lima menua tu iya nya India penyampau RM394 juta (11 peratus), negara timur tengah penyampau RM 327 juta (9 peratus), Taiwan penyampau RM239 juta (7 peratus ) enggau Korea penyampau RM193 juta (6 peratus).

Suara Sarawak