SIDA ti ngempu gelar kumang nya ukai sengapa orang lalu udah tentu sida ngembuan pengelebih enggau penyelai kediri empu.
Kumang patut ngembuan pakej ti menyana nyengkaum pemajik gamal, pemanah raras tubuh, pemintar runding, ulah ti beradat sereta ngembuan bemacham pengelandik enggau penau.
Taja pen agi biak bendar tang nya enda nagang siku anak Iban, Elvina Lan, 19, masuk Pekit Miss Queen of The World Malaysia (QOTWM) 2023.
JULUK BESAI
Dara asal Marudi nya ransing masuk Pekit QOTWM 2023 dikena ngubah nasip ruang bilik diri ngambi manah agi.
Bepegai ba juluk nya sereta minat ba pekit kumang, Elvina mutus ati masuk pekit QOTWM 2023 taja pen nyadi siku penyereta pemadu biak.
Ukai semina ngembuan pemajik gamal enggau pemanah raras tubuh, iya siku indu ti pintar sereta nyulut ba akademik.
Nya meh ti dikumbai orang kemaya hari tu beauty with brain lalu nya patut dikembuan genap indu.
Indu kemaya hari patut ngembuan personaliti nyelai kelimpah ngembuan pemajik ari dalam enggau luar.
Udah tentu nya nengah pelajar sereta bemacham pengelandik enggau penau dikembuan sida.
Nya alai, anang ngetu lalu anang enggai belajarka mayuh pekara ngambi kitai patut dikumbai beauty with brain sereta ulih mai empas manah ngagai orang bukai ngelingi kitai.
“Aku chukup beterima kasih laban diberi peluang ngarika Sarawak ba panggau QOTWM 2023 tu.
“Terima kasih mayuh ngagai Biubiu Beauty Shop laban nyadi pemelanja enggau meri sukung ngagai aku masuk pekit tu,” ku iya.
Juluk besai Elvina nya bela disukung penuh sida sebilik kelebih agi indai iya empu.
Elvina ngaku diri temegah meda penyulut Mrs Global Asian 2023, Kimi Tomas ti mujur ngangkatka nama Borneo kelebih agi Sarawak ba mata dunya.
“Penyulut Kimi tu meri peransang, motivasyen enggau inspirasyen ngagai semua indu nyangkaum aku empu.
“Nya alai, aku deka nunda singkang iya ngangkatka nama Sarawak ba panggau dunya,” ku iya.
PENYELAI NGEPAN IBAN
Ba pekit nya, Elvina madahka diri temegah mandangka ngepan Iban iya nya kostum ‘Kumang Batang Rajang’.
Kostum nya ditengkebang siku penengkebang pisin tebangkar nama, Gilbert Headhunter.
“Ngepan tu ngembuan reti kediri empu. ‘Ketapu’ ti bemacham chura mandangka Sarawak ngembuan bemacham bansa, etnik, main asal enggau budaya.
“Bungai ba gaun nya digaga ari kulit tekalung. Ba budaya orang Iban kelia, kulit tekalung nya digaga nyadi pekayan.
“Gaun bechura gadung nya mandangka Sarawak kaya enggau pemanah rampa menua tulin, gadung sereta diuan bemacham biodiversiti,” terang iya.
INGAT ASAL PENATAI DIRI
Taja pen ngembuan darah champur China muak ke sepiak apai tang iya temegah enggau main asal Iban.
Kebuah pia laban agi mit suba iya diibun sereta diuan aki enggau ini iya muak ke indai ti peturun Iban ti diau ba Marudi.
“Aku diau ba rumah panjai lalu ngemeratka gaya idup enggau budaya Iban ba rumah panjai.
“Taja pen diatu aku enda diau ba Sarawak tang aku tetap anak Iban ti ngemeratka budaya bansa diri.
“Pia mega, aku chukup temegah mandangka tanda asal tauka tradisional Iban iya nya ‘ngajat’ ba kolej endur aku besekula ditu.
“Ukai naka nya aja, aku temegah mandang ngepan Iban ngagai bala bakih, pengajar enggau komuniti ba Seremban, Nengeri Sembilan ditu,” terang iya.
Elvina madah, ngepan Iban nya mai reti ti besai bendar ba iya laban nya siti tepa ti diberi indai ngelai penyayau indai ngagai iya.
Ungkup penerang, dara bajik nya diau ba Seremban laban nitihka apai indai iya ti gawa ba nengeri nya.
Taja pen ba menua orang tang indai semampai narak budaya Iban ngagai iya ngambi semampai ingat senentang asal penatai diri taja diau ba menua orang.
Iya nyemetak madah, bejalai betungkatka adat, tinduk bepanggalka pengingat lalu pia mega dikelala daun ari kayu, dikelala buah ari langgu, dikelala bansa ari jaku, dikelala ulah ari penau, dikelala basa ari penyiru.
NGEMERAT PELAJAR
Ketegal deka ngulih penemu enggau pelajar ti menyana agi, Elvina ngaga pemutus nitihka apai indai iya ke Nengeri Sembilan.
Begulai enggau dikemesai aki ini ari mit, udah tentu nya pemutus ti berat digaga ba iya tang nya dikena nyamin tunga kuing diri ti tampak agi dudi hari.
Semua nya tebukti lebuh iya mujur bulih pemutus peresa nyulut ba Sijil Pelajaran Malaysia (SPM) tu tadi iya nya 7A.
Udah nya, iya nampung pelajar diri ngagai Kolej Pom Enam Forest Height ba Seremban.
“Ba semester keterubah, aku bulih PNGK 3.67 enggau bulih PNGK 3.58 ba semester kedua.
“Aku ngarapka diri bulih pemutus peresa ti chukup nyulut ba Sijil Tinggi Pelajaran Malaysia (STPM) 2024 ila sereta ulih tama palan pelajar tinggi ti dikerindu aku,” ku iya.
Elvina sedar, semina pelajar aja ulih ngubah nasip sesiku orang, ruang bilik, komuniti enggau bansa.
BARUH ATI
Tebal agi rebak dudi kemaya hari tu, malu mantu apai indai sida bedaja tauka bejual sebelah tamu tang nya bebida enggau Elvina.
Elvina semampai mantu indai iya nyual mi kampua enggau mi kolo ba Pasar Tamu Dayak Seremban ninting Hari Minggu.
Ukai semina nyual pemakai tebilang Sarawak nya aja, indai iya bela nyual enggau mantai pemakai tebilang ba pelilih Marudi iya nya pinsit tauka wantan.
“Aku semampai mantu indai bejual ba Pasar Tamu Dayak Seremban dikena ngelempung tating pengawa iya.
“Taja pen semina bejual ba pasar tamu, aku enda malu tang nya ngasuh aku balat temegah laban ulih nyual pemakai tebilang Sarawak ba menua orang.
“Tu siti chara dikena kitai mantaika penyelai pemakai kitai ngagai bansa bukai ngambi sida ngelala agi Sarawak lalu datai ngagai Sarawak ngambi ulih ngasaika peneleba nyelai nya,” tusui Elvina.
Iya meransang rebak biak enda mudah nyerah alah ba sebarang pengawa dikereja sida tang terus pechaya ngagai diri empu laban sida deka ngetau asil ari pengawa dikereja sida.









