EMP ngiga artis baru

Extreme Music Production (EMP) siti kompeni ngerikod lagu ti bepalan di Johor Bahru. Ditumbuh dalam bulan June 2018 lalu mujur ngerikod lagu Iban, Melayu lalu bisi mega perambu deka ngerikod lagu China.

Kebendar, EMP nya siti kompeni ti diempu anak Iban Sarawak ke endang bisi penemu enggau peneleba ba dunya pemerindang.

Orang ke ngempu EMP tu, Randy Detailer enggau Ricky Ajan. Seduai dibantu siku agi bakih iya nya Syamsul ke mangku pengawa nyadi “digital content officer”.

EMP diatu bisi komposer tetap iya nya Lalak JB enggau Patrick Kiding. Nambahka nya EMP mega tau dikumbai betuah laban bisi gitaris ti chukup landik Beethoven Peter ke nyadi “music arranger” tetap sida.

Taja agi baru ba industri muzik, mensia mayuh ulih nemu enggau dalam agi pasal EMP nengah page EMP, facebook enggau instagram sida.

KENANG…Begambar kenang enggau raban finalis EMP Rising Star 2019.

“Ngagai nembiak rebak baru ke bisi pengelandik ba pengawa belagu tau betanya ari kami enti deka nyadi artis lagu ba kompeni kami.

Taja pia, kami bisi atur napis kita dikena nyaga kualiti nitihka kriteria ti udah ditetapka kami. Kita tau nanya kami sebarang ‘maya”, ku Randy Detailer.

Album Kompilasyen EMP Rising Star

Siti ari projek baru udah mujur diatur apin lama tu tadi nya audisyen endur ngiga 10 iku artis baru album kompilasyen EMP Rising Star 2019.

Ari 60 iku sida ke masuk audisyen, semina 12 iku iku aja dipilih masuk ba album nya nya.

Komposer Mike Pos’ner

Taja pia, dua iku ari sida deka ngerikodka single ke semina ulih dipeda ba youtube enggau media rama.

“Aku meri besai terima kasih ngagai semua penyereta ke berani nyereta audisyen.
“Semua sida nya manah magang tang kami ari EMP semina ulih ngambi 12 iku iku aja. Taja enda nyadi artis EMP, kita nyangka bisi peluang enggau kompeni bukai.

“Anang putus pengarap au,” ku Mike Pos’ner, siku komposer ke benung ngangkatka nama diri.

Artis EMP Rising Star 2019

Sida 12 iku ti betuah udah dipilih nyadi artis album kompilasyen EMP Rising Star 2019 nya Viviana, Sylverneza, Stacy, Magdelene, Maria, Julai, Jane, Ian Maxwell, Felix, Cornielia, Augustine enggau Dyland.

Ditanya sentang lagu sida nya, Mike Pos’ner madah sida tu bela udah bisi lagu magang.

Maria

Sida sebuat ti dipilih nya mega ku iya bisi genre muzik kediri. Sida dipilih ngena chara nya awakka lagu enggau muzik ba album nya ila ulih narit mayuh agi peminat lagu Iban.

Begulai Sejalai nengah muzik enggau lagu

Industri muzik nya siti “universal entity”. Industri muzik Iban ukai diempu orang Iban aja tang diempu semua orang. Kebuah pia laban semua orang ulih belagu lagu Iban.

Sida mega nadai sekat nyadi artis lagu Iban; sebaka mega enggau kitai Iban ke ngerikod lagu Melayu, lagu English tauka lagu bukai.

Mike Pos’ner udah mayuh nunjukka penemu enggau pengawa ti badas ti tau nyadi chunto ba industri muzik maya ke diatu.

Cornelia

Bekunsika info, promo enggau gerah nengah page, facebook enggau link nya utai ti chukup manah dikereja iya.
Pengawa nya ti bendar ulih ngempung semua anak seni diau lantang ba industri pemerindang.

Kitai arap makin mayuh orang bukai mai penemu ti ulih mai kitai begulai sejalai enggau pangan diri.
Pengawa ti selalu besukung enggau pangan diri ulih meri ruang enggau peluang pengawa ti lebih badas ngagai raban artis.

Besukung pangan diri

Ba industri tu kitai enda ulih diau kediri makai nengali. Kaul tauka “networking” ti badas deka nentuka pejalai kitai jauh tauka semak.

Nambahka nya, penyiru kitai enggau pangan diri mega deka nentu sekali ke kitai diterima orang bukai tauka enda.
Dipuntangka ngena jaku pandak, pemanah, penyiru enggau pemereti ati kitai enggau pangan diri deka nentuka “value” tauka rega siku-siku kitai.

Dyland

Ba kontek industri iya dikumbai “commercial value” lalu “commercial value” nya mih ti nentuka pengelaku siku-siku artis.

“Ngena peluang tu aku deka meri besai terima kasih ngagai semua orang ti udah mantu pengawa audisyen kepenudi finalis EMPempai lama ke udah.

“Terima kasih ngagai semua kita ti udah datai kelebih agi ngagai semua “co-sponsors”

Datin Regina Sugarbom Perfume, Datin Bee John, Elizabeth Janet, Sakura Diana Dawi Embroidery, Kumang Baik Beauty, Dorsica Robert, Teelong Tee, Jane Chumai, Fredrick Rino, Dino, John Watson, Connie Francis, Akeyla Yanna, Hilda & Eddy Brown, Am Lepak Musi Cafe, Maligai Baru Club, MK Smokehouse, Logan Road House, Simon & Family, Rumah Pansu Dayak, Humah Nibong, D’ Dayak Cafe, Auz Auz Bistro, Dato Jaguar ABS enggau Nur Hananie,” ku Mike Pos’ner ngujungka randau kami sebuat.

Kitai arapka EMP ulih nyapai juluk. Enggau nya kitai mega arapka sida semampai ngetanka kaul ti badas enggau peminat lagu Iban di Sarawak.

Kitai pechaya enggau komposer ti landik baka Lalak Jb, Patrick Kiding enggau Mike Pos’ner, EMP ulih nitih tauka nyerumba kompeni rikot bukai ke udah dulu bisi nama di Sarawak.

Augustine