Empana landik ngaga chiping tuak

Digaga ari lengkuas, lia, kayu manis, lada putih enggau tepung beras

“Chiping ke digaga iya semampai ditanya lebih agi jam Iban nyendiaka diri ngintu Gawai enggau nyambut taun baru (ujung taun).”

SIBU: Chiping kereban pemadu beguna ba bansa Iban kenyau ari kelia dikena ngaga tuak nyadika pedara piring petara maya bisi ngatur gawai.

Bansa Iban enggai pungkang tuak ba bilik diri nangika pengawa ngenyit nyadi baka diasuh petara nirika gawai tauka pengawa bukai ti bekaul enggau pengidup sereta pengerai.

Tang ketegal segang pemansang enggau ubah dunya maya hari tu adat miring nyau enda dikembuan agi bepun ari bansa Iban mayuh mekuh pengarap Kristian tauka pengarap bukai.

CHAMPUR: Empana benung nyediaka kereban dikena ngaga chiping.

Taja pia, pengawa ngaga tuak endang agi dikemeranka bansa Iban nyentuk ke sehari tu.

Ketegal pekara nya, Empana Jantan ari Miri semampai kisuk dalam kandang 16 taun nimbal peminta mensia mayuh meli chiping ari iya.

Laku jam semak pengerami

Maya berandau enggau pengarang kemari, iya madah, chiping ke digaga iya semampai ditanya lebih agi jam Iban nyendiaka diri ngintu Gawai enggau nyambut taun baru (ujung taun).

“Amat bisi dibeli ba hari bukai tang pemadu mayuh dibeli bulan sebedau Gawai enggau ujung taun, ” pia ku iya madah.

BAKA TU: Empana mandangka chara iya ngelumai chiping.

Bekunsi cherita pengawa iya ngaga chiping, ku iya, iya ulih ngaga urung 60 ngagai 80 kilogram dalam sebulan.

“Mayuh renggat ngaga chiping, bepun ari nyampur kereban ke dikena nyentuk nyembi.

“Dalam sebulan aku ulih ngaga nyentuk 80 kilogram, ” ku iya madah.

Empana mega enda rangka penemu madahka nama bagi kereban ke dikena iya.

Chara ngaga chiping

SEGALA: Empana ngempuk tepung ke udah dilumai nyadi segala.

Chiping iya ku iya, digaga ari lengkuas, lia, kayu manis, lada putih enggau tepung beras.

“Nadai ngaga bansa chiping bukai. Chiping ke digaga aku endang chiping tuak.

“Kereban ke dikena ngaga dichampur magang sebedau digagaka segala udah nya dijembi, ” pia ku iya enda nyalam.

Pengawa iya nyembi chiping bisi disaup menantu iya, Runin Latong.

Tang Empana madah, pengawa endang dikereja iya kediri aja.

LAKU: Chiping Empana suah nerima peminta mensia mayuh.

“Enggai nyadi mayuh jari megai.

“Aku aja ngulai enggau ngaga chiping, ” ku iya madah.

Nerima pinta ari mayuh menua

Kelimpah dibeli orang ari Miri, ku iya, orang ari menua bukai mega begunaka chiping digaga iya.

“Ukai semina orang di Niah aja suah meli chiping aku tang bisi mega ari menua bukai baka Machan, Kanowit enggau Sibu.

“Sida ulih ngudar chiping enti enda ulih ngelawa kitu, ” pia ku iya.

Beserimbai enggau Gawai Dayak ke deka diintu enda lama agi, mensia mayuh tau ngelawa meli chiping iya di SPAD, Ladang Kosa, Miri.

Sida ke jauh tau betelefon ngagai lumur 016-8851257 tauka 019-8448896.

LANDIK: Empana nyembi chiping.

Suara Sarawak