KUCHING: Perintah Sarawak nurai enam inisiatif baru dikena nyungkak industri berumah nengeri tu lalu mantu serikat kunteriktor nyeliah penanggul projek tejanggal.
Premier Sarawak Datuk Patinggi Tan Sri Abang Johari Tun Openg madah, inisiatif baru nya nyengkaum Perintah Sarawak setuju ngemendarka pengawa meri insentif ngagai sektor berumah, udah nya masukka barang baru enggau bemacham barang bukai ba rintai Variansyen Rega (VOP).
Ku iya, inisiatif nya mungkur bayar panjar kunterik kereja ngagai raban ti dikaul nyengkaum ‘serikat dua dollar’.
“Kitai deka meri bayar panjar laban bisi sekeda serikat kurang puku, nya kebuah perintah deka mantu sida ti dikumbai ‘serikat dua dollar’ tu.
“Tuju kedua, meri pemendar nyentuk panjar dibayar tiga kali enggau nadai dokumen kunterik dalam timpuh empat bulan keterubah timpuh kunterik.
“Kelimpah ari nya, perintah mega deka meri penyampau kurang agi ba utai ti rusak tauka penanggul projek ti dikelala,” terang iya.
Abang Johari mantaika inisiatif nya rambau Pengawa Bejadika Seminar Nyungkak Industri Berumah Sarawak ba Palan Aum Besai Borneo Kuching (BCCK) ditu tadi.
Ngenang silik ku iya, inisiatif bukai nyengkaum bayar abis mimit ti baruh agi sereta chara bukai dikena ngelempungka belanja projek ti ditekul rega barang niki.
