SARIKEI: Enam iti da agi projek di baruh Program Transformasyen Menua Pesisir (RTP) 2023 ti dipejalai ba sitak Repok diatu udah tembu.
Sapit Menteri Pengeraja Asal enggau Pemeruan Rampa Menua ti mega Kaban Parlimen Sarikei sereta Kaban Kunsil Sarawak (DUN) Repok, Datuk Seri Huang Tiong Sii madah, pengeransing perintah nyendia perengkaguna ke rayat nyengala dipeda pengudah projek RTP nya tembu.
Ku iya, belanja ti diagih nengah Projek RTP enggau ejensi pengereja pengawa iya nya Kaunsil Pelilih Sarikei (MDS).
“Penembu projek nya nunjukka pengagit perintah nentuka rayat bulih penguntung ari perengkaguna ti disedia.
“Aku ngarap semua projek ti tembu tu meri penguntung ngagai semua peranak ba kandang menua tu,” ku iya.
Projek nya nyengkaum niri baru pagar tepikong ba Tokong Di Mu, mekal atap enggau masang tali karan besai ba Rumah Jalang Embas, ngaga baru parit di Rumah Buni Bajau, ngaga baru paip ba Rumah Anong Bunsi, ngerata taba di belakang Rumah Rosyvia Ubak sereta ngerata tabas ba mua Rumah Nyila Kasim.
Taba projek nya diserah ulih pegawai MDS ngagai pengari tepikong enggau rumah panjai ti diperatika Kapitan Ling Dien Yong ti ngarika Tiong Sii apin lama ti udah.
Bisi bela datai, Sapit Injinir MDS, Joviana Joklin, Kaunsilor Anthony Suding sereta pengari kunteriktor.
