LUNDU: Agih belanja sepenyampau RM830,000 nengah Program Transformasyen Menua Pesisir (RTP) dikena nyeruri jalai kebun di Kampung Sebago Dayak, Kampung Titiakar enggau Kampung Biawak dikearap ulih ngemanahka akses ngagai kandang endur betanam butipi sereta ngemuntangka pengawa ngangkut asil menua tu.
Kaban Kunsil Nengeri (ADUN) Opar, Billy Sujang madahka pengawa bejalaika projek infrastruktur nya meseti berati ka guna peranak kebendar dikena nentuka perengkaguna ti dikemansangka nya ulih nyukung aktiviti ninting hari enggau ekonomi komuniti menua pesisir.
“Ari penyampau nya, RM320,000 udah diungkupka ngagai Projek Nyeruri Jalai Betanam Butipi Sungai Merah di Kampung Sebago Dayak, lalu RM330,000 agi ungkup Projek Nyeruri Jalai Betanam Butipi Kampung Titiakar.
“Kedua projek tu agi ba renggat perambu tumu lalu pengawa ngelawa palan nya nangkan tu ila deka diadu dikena ngulihka sukat sereta ngemujurka skop kerja sebedau pengawa bejalaika projek nya diteruska,” ku iya.
Billy bejaku munyi nya rambau nemuai ngagai tiga palan projek pemansang di kandang menua nya kena Hari Enam tu tadi.
Ku iya, skop pengawa dua projek tu iya nya ngemanahka jalai tanah ngagai jalai belakin pemesai 10 kaki, nyengkaum ngaga engeklebat dikena ngemanahka agi jalai penyambung ngagai kandang endur betanam butipi.
Berebak enggau nya, iya madahka siti agi projek ti beungkus RM180,000 iya nya Projek Nyeruri Jalai Betanam Butipi Engkabang Batu, Kampung Biawak Renggat 2 udah tembu penuh kena 5 Oktober 2026.
Projek ti berengkah dipejalaika kena 8 April 2026 tu nyengkaum pengawa ngemanahka jalai tanah ngagai jalai bepisir sereta ngaga engeklebat.
Billy mega bisi madahka sekeda projek pemansang bukai di Kampung Biawak udah dikemendar lalu deka dipejalaika enda lama da agi nyengkaum Projek Melakin Jalai Rumah ke Rumah Renggat 3 enggau pengawa masang lampu rumah peranak menua.
Sama bisi datai Pem esai Opis Pelilih Menua Lundu, Mohd Syatiee Ahmad. -EDISI UKAS
