SIBU: Raban Tuai Komuniti enggau Tuai Raban Bansa (KMKK) enda tau enda tegap penemu ngambi nyadi raban ti ngempung rayat ngenggat baru.

Sapit Premier Sarawak, Datuk Amar Douglas Uggah Embas madah, raban nya ukai semina patut mereti enggau puh ngintu adat aja, tang ulih nerang, bedua penemu sereta nipak pesaka adat enggau pengidup moden.

Ku iya, tangkup pengawa bala Tuai Rumah, Penghulu, Pemancha enggau Temenggong besai endar laban sida tu nyadi terabai ti ngembing enggau meritika sida perminta nembiak redak sereta nyadi jematan entara rayat enggau perintah.

“Bala kita tuai-tuai raban bansa ngembuan penuduk ti besai reti. Kita mih raban ti meritika nembiak redak ti kena pegal diri.

“Kita nemu sejarah rumah panjai enggau menua diri, nemu adat ti dikena ba menua diri sereta nemu nama isu tauka penanggul ti ditapi nembiak redak ke dipegai kita,” ku iya.

Uggah nibarka jaku nya ba Pengawa Bejadika Simposium Adat Iban 2026 ba siti hotel tebilang di Sibu, empai lama.

Iya madah, penuduk KMKK enda patut dipeda semina ari sukut pangku pengawa tauka tusun gawa aja, tang nyadi siti pengawa besai dilempai dikena nentuka adat, nilai, sejarah enggau hak rayat seruran dijaga.

Kebuah pia ku iya, jaban sida nya nyadi entara raban pemadu semak enggau komuniti kelimpah ngembuan penemu sereta peneleba bekaul sejarah rumah panjai, adat menua enggau penanggul ditapi rayat.

“Nya alai, kena manah peneleba enggau penemu bekaul undang-undang, atur gawa perintah enggau utai ke nyadi kemaya hari ngambi kita ulih bejalaika pengawa enggau dikeamat.

“Tambah mega, kita mih dikeandal nyadi jematan dikena nyambung rayat enggau perintah,” ku iya nyemetak.

Uggah madah baru, tangkup pengawa besai nya ngasuh KMKK nyadi jematan besai ke mai sida perminta rayat ngagai perintah ngambi ulih diperunding enggau dikeamat.

Ku iya, nya begun a endar laban rayat kitai ditu majak mayuh leman ke ngasuh bala tuai enda tau enda meretika agi pekara ngelala adat enggau undang-undang.

“Pemereti ati tu begun a endar ngambi tetiap pemutus enggau pengawa ulih digaga bepelasarka sadang penemu ke betul, lurus enggau berundingka hak komuniti sida empu.

“Nya kebuah aku ngarapka Simposium Adat Iban 2026 ulih nyadi pelasar nambahka penemu enggau penau bala KMKK gawa.

“Tu kelebih agi sida ulih meritika prinsip, rasional enggau konteks siti-siti adat, ukai semina nemu chara ngatur adat ke ditampung ari aki ini meny a.

“Kita dekaka tuai-tuai raban bansa tu ukai semina nemu adat, tang mega nemu prinsip, rasional enggau konteks adat,” tandu iya.

Berindik ari nya, Uggah madahka penau nerangka reti enggau rasional adat ngagai rebak baru mega begun a endar dikena nentuka adat ukai semina masau ba pengidup sida, tang ditemu reti nyadi siti sistem nilai ke ngembuan tuju enggau pun kediri.