Enam rayat Sarawak tepekul di Pulau Solomon dibai pulai

KUCHING: Enam rayat Sarawak ti tepekul di Pulau Solomon diatu benung dibai pulai ke menua.

Empat ari sida ke datai ari Kapit benama Edau Mengit, 45 taun, Melingang Laja, 43 taun, Ricky Alex, 26 taun, enggau Ugot Masam, 31 taun.

Seraya dua ke bukai benama Denis Anyie Ngau, 46 taun enggau Anyie Ngau, 43, ari Baram.

Nitih ku penerang, sida diatu di Singapore lalu dipelaba datai di Kuching pagila.

Pemujur ngemai pulai sida tu asil ari pengawa Sapit Kepala Menteri ti mega Kaban Kunsil Nengeri (Adun) Baleh Tan Sri James Jemut Masing enggau Adun Telang Usan, Dennis Ngau nengah kaul kerejasama Wisma Putra.

PULAI ENGGAU LIKUN… Enam rakyat Sarawak yang terkandas di Kepulauan Solomon diuluka Mohd Reeza (tiga kiba) benung ba pejalai mulaika diri ke Sarawak.

Pengawa tu mega disaup Menteri Luar Datuk Saifuddin Abdullah, Ketuai Sekretari iya, Datuk Seri Muhamad Shahrul Ikram Yaacob, Pesuruhjaya Tinggi Malaysia di Port Moresby Mohamad Nasri Abdul Rahman, Konsul Kehormat Malaysia di Pulau Solomon Hii Yii Ging, Mohd Rezza Mohd Yusof ari Opis Konsulat Malaysia di Papue New Guinea enggau Kaban Parlimen (MP) Hulu Rajang Datuk Wilson Uggah.

Kenu ku Dennis, sida betubuh enam iku tu tepekul di Pulau Solomon pengudah napi penanggul enggau pengaji ti ngemai sida kereja batang din.

Sida udah nya dibai ngagai Opis Konsul Kehormat Malaysia di Pulau Solomon kena 13 Mei tu tadi mantaika penanggul ditapi sida.

Pengudah nemu pasal penanggul ti nuntung sida nya, Dennis udah nya naka ulih minta bantu dikena ngemai sida tu pulai kelebih agi meli tikit bilun, dipadah manggai RM3,800 siku.