BINTULU: Enam iku ditangkap di Bintulu ketegal dipelaba nikau bom molotov ngagai rumah siku orang dagang di Bukit Orang ditu, lemai kemari.
Tuai Polis Pelilih Bintulu, Supt. Nixon Joshua Ali madah, saspek ditan pukul 4.11 lemai iya nya kurang ari 24 jam pengudah video pengawa nikau bom nya dikemegau di sebelah media sosial kena 12 Oktober tu tadi.
Ba operasyen nangkap saspek nya, raban polis bela ngerampas sebuah entukar, sekeda unit telefon binching enggau pekayan ti dipelaba dikena saspek.
“Semua saspek deka ditan reman enggau dipansik nitih Seksyen 435 Kanun Keseksaan (laban beduan ngena api),” ku iya ba sebengkah penerang sehari tu.
Nixon ngenuku video sepanjai satu minit 33 sikin ti dikemegau di sebelah media sosial nya endang diambi di Bintulu.
“Rikod kamera litar betutup (CCTV) mandangka tiga saspek ti ngena pekayan chelum pansut ari entukar lalu nikau bom ngagai sebuah rumah ti ngasilka bunyi meletup enggau angus,” ku iya.
Iya madah, berebak enggau kes nya, seraban polis ari Opis Pemansik Penyalah Indu Opis Polis Pelilih Bintulu bejalaika operasyen khas dikena ngasu saspek.
“Asil ari pengawa meresa tetemuka saspek ngembuan 15 rikod penyalah sebedau tu nyengkaum penyalah dadah,” ku iya.
Nangkan nya, iya ngelalau mensia mayuh enda ngaga sebarang peragam ti ulih ngeruga pansik ti dipejalaika raban polis.
Nixon mega meransang mensia mayuh ti bisi penerang bekaul kes nya betelefon terus ngagai pegawai pemansik, Inspektor Lai Mei Ching ba lumur 014-8763824 tauka Bilik Operasyen Polis Pelilih Bintulu ba lumur 086-318304.
