Enda ibuh kiruhka isu Jawi

KUCHING: Kepala Menteri Datuk Patinggi Abang Johari Tun Openg enggai isu tulis Jawi dibai ke Sarawak.

Iya madah nya semina isu mit lalu enda ibuh malut diri ngagai isu nya.

“Nama kebuah kitai patut kiruhka isu mit tu. Jawi kah, kaligraf kah, kapa deka kiruh.

“Sarawak ngembuan polisi kediri, nya kebuah kitai enggai pekara mit tu datai,” ku iya.

Iya madah munyi nya ngagai pemberita rambau aum pemberita pengudah ngemataka Pengawa Nyerah enggau Nerima Tanggungpengawa Ngaduka Baru enggau Transformasyen Opis Kampung Sarawak (JHS) enggau Sarawak Forestry Corporation (SFC) di Wisma Bapa Malaysia, ditu kemari.

Iya dirandau bekau pemutus perintah Sabah deka tulis Jawi diajar nyadi siti subjek pilih ukai dipasuk dalam subjek Jaku Melayu.

Tang, Abang Johari nyemetak madah utai ke patut dikemerat iya nya baka ni deka mantu rayat, mutarka ungkus pengidup enggau nyendiaka pengawa puang.

“Kitai meseti nguji naka ni ulih ngenegapka ekonomi tu,” ku iya.

Opis Menteri Pelajar Malaysia (KPM) udah nekanka pengawa belajarka tulis Jawi dalam subjek jaku Melayu ba sekula primari ungkup renggat sekula taun tu.

Taja pia, pekara tu terus nerima bantah ari gerempung-gerempung China nyengkaum Serakup Besai Gerempung Kaunsil Pengintu Sekula China Malaysia (Dong Zong).