Enda lebu datai jauh

Asil dagang nyerumba Sarawak Timber & SMEs Expo 2019 manggai RM10,000

“Hari keterubah bejual aku bulih RM3,600 lalu dalam tiga hari setengah bejual semak RM10,00 asil ari dagang tu ngasuh ati aku madah enda lebu datai.”

KUCHING: Empat hari berunggu bejual ba Sarawak Timber & SMEs Expo 2019 bulih untung manggai RM10,000 ngasuh bala orang dagang mit enggau jelan pemesai madah enda lebu datai jauh.

Fransiska Blantau, 43 taun bedagang pua kumbu Iban asil gaga jari iya empu madah pengirau ati iya lenyau pengudah dua hari bejual.

“Tu keterubah aku enggau bejual ba ekspo tu. Laban menua kami jauh endang irau amat ati aku ngerunding belanja mansang kitu, nadai orang dikelala sereta tambang laban ukai aku aja ti kitu, mayuh bala enggau barang dibai aku.

Anne Martha

“Hari keterubah bejual aku bulih RM3,600 lalu dalam tiga hari setengah bejual semak RM10,00 asil ari dagang tu ngasuh ati aku madah enda lebu datai,” ku iya ti datai ari Kapit.

Indai ngagai tiga iku anak tu madah pengawa bejual pua kumbu tu ukai batang pengawa iya laban sida semina beumai enggau bekebun.

“Lebuh bisi awak diau ba rumah aku belajar ari entua aku empu ngaga pua kumbu lalu bejualka pua tu nengah telefon, media rama enggau ngulu ekspo baka tu.

“Ninting bulan asil diulih aku ari dagang pua kumbu tu enda kurang ari RM7,000,” ku iya madah.

Ku iya, pua kumbu lama ti pemadu mar dijual iya berega RM10,000 laban digaga ari ubung taya (ubung asal pua kumbu).

PUA KUMBU…Barang ti dijual ba Sarawak Timber & SMEs Expo 2019.

“Kelimpah selampai, aku bisi mai baju burung, kain kebat, sirat, selap mija, selap bangku enggau pua mit dikena ngias rumah.

“Aku amat lantang ati ngulu ekspo tu laban sambut ari bala ti datai endang manah, lalu enti nadai penanggul jemah aku endang enggau ngulu ekspo tu baru,” ku iya.

Kelimpah ari nya, Anne Martha, 68 taun ari Bau mega ngasaika pengulih ti sebaka ba ekspo tu.

Pinchin indu misi tu bebansa Lunbawang tu madah pengerindu nusuk manik ngasuh iya ngaga pengelandik jari tu nyadi dagang.

“Mayuh urang muai kerubung plastik kuie enggau kerubung ai kutak tang aku laban sayauka rampa menua lalu ngaga barang dibuai tu nyadi barang dikena ngias rumah.

“Sapa orang ulih nyangka urung tiga hari aja aku mujur bejualka kerubung tekuyung, plastik, manik, besi kipas angin enggau ke bukai manggai RM10,000,” ku iya nusi.

Ku iya, ekspo tu meri mayuh pengulih seraya ngerapatka kaul enggau bala ti bisi datai.

“Aku ninting kali ekspo endang ngambi bagi laban sigi rindu ngulu pengawa ti meri penatai pemisi ngagai bala orang ti bedagang mit enggau jelan pemesai,” ku iya.

ILA DATAI BARU….Fransiska Blantau enggau entua iya ngayanka pua kumbu.