KUCHING: Taja TVS agi baru lalu mayuh utai deka diuji, tang kitai enda ulih meda pengawa tu semina dikena nguji aja, ku Ketuai Pemesai Eksekutif Kumpulan Media Sarawak (SMG) Suhaimi Sulaiman.
Iya madah, sida dekaka TVS tu gawa baka stesyen televisyen bukai, berita enggau program dibantai chukup penyilik sereta ngerinduka ati.
“Kebuah pia laban kami ngenggaika orang ke meda program ditabur nadai kualiti tauka enda manah lalu tau ngasuh orang jampat leju ngujungka sida badu agi rindu meda program kami.
“Pemar ditapi kami diatu iya nya nentuka program ti manah enggau bisi kualiti ditabur ba TVS,” ku iya lebuh dirandau ba Opis TVS apin lama ke udah.
Nambahka nya, pengelebih TV Sarawak iya nya ngembuan ketuai program ti landik ba mayuh bengkah pengawa.
Ku iya, semina TVS aja stesyen televisyen ti bisi empat iku megai tikas pelajar Doktor Falsafah (PhD) nyadi ketuai program.
“Kelimpah ari nya, tebal agi bala personaliti TVS mega dipinta bejalai gawa ngagai renggat baruh ngiga berita.
“Reti iya, sida ukai semina macha berita aja tang mega patut bejalaika pangku pengawa nyadi pemberita,” terang iya.
