Enda ngadang nyadi champion

KUCHING: Champion lumba ensikal renggat keterubah Pekit Lumba Le Tour de Langkawi 2020 renggat ke-25, Yevgeniy Fedorov ari Khazakhstan enda ngadang diri ulih champion ba pekit lumba penyauh 98 kilometer di Padang Merdeka, ditu pagi tadi.

Pelumba biak beumur 20 taun nya mega bulih tiga anugerah enggau jersi burak ungkup pelumba Asia pemadu nyulut, kuning ngagai pelumba pemadu nyulut nitihka jam enggau pelumba pemadu sikar Petronas nerima jersi chura gadung.

Yevgeniy ti agi belajar ba palan pelajar tinggi di menua iya mega berasai chukup gagit ba pemujur keterubah iya dalam lumba tu.

“Aku ngumbai diri semina bulih penuduk ke-14 maya belumba ensikal tang aku empu tekenyit enggau pemutus tu.

“Maya belumba, aku semina fokus ngambi jampat datai ba adan tang enda nyangka aku deka menggi gelar champion,” ku Yevgeniy.

Iya mansutka jaku nya ba aum pemberita pengudah Pekit Lumba Le Tour De Langkawi renggat ke-25 di Padang Merdeka, ditu tadi.

Terang Yevgeniy, iya kala nyereta pekit lumba enggau bakih iya dalam taun 2019 tang enda nerima midul lalu lumba LTdL renggat ke-25 nya lumba kedua disereta iya ba Malaysia.

“Sebedau tu, kaban aku kala bulih midul pirak ba lumba ke bisi diatur ba Malaysia sebedau tu.

“Sekali tu, aku mujur mai pulai midul emas enggau tiga jersi chura burak, gadung enggau kuning ba semua anugerah diterima aku,” terang iya.

Nambahka nya, iya deka fokus ngagai lumba ke disereta iya sehari tu (Hari Enam) di Kuala Terengganu.

Suara Sarawak