KUCHING: Atlit terejun Sarawak, Enrique Maccartney Harold mujur nembuka pekit terejun kepenudi iya enggau siti midul emas pengudah empat kali ayan ba Lumba Malaysia (Sukma) XXI Sarawak sekali tu.

Ba renggat kepenudi 10 meter (m) platform lelaki ti diatur ba Palan Akuatik Pandelela Rinong, penerejun biak beumur 21 taun nya ngumpul 409.10 mata ba enam renggat terejun sereta ngalahka 11 penerejun bukai.

Midul pirak bela diempu atlit Sarawak, Elvis Priestley Clement nengah 390.25 mata lalu atlit sabah, Muhammad Anilrian Normatr Abdullah mai pulai midul engkeraju pengudah ngumpul 330.40 mata.

Taja pen menggi penuduk keterubah ba pekit nya, Enrique madah, iya bedau tepantup ati enggau gaya penerejun iya tadi.

“Endang amat mata diulih aku besai agi ari penerejun bukai tang mata (490.10) tu bedau ulih nyapai selinting aku…laban aku nyelinting mata ti manah agi.

“Taja pia, aku beterima kasih laban mujur bulih midul emas lalu tu emas keterubah aku ungkup kategori kediri aku pengudah empat kali bepekit ba Sukma.

“Tang sayau umur aku diatu manggai 21 taun lalu tu Sukma kepenudi aku,” ku iya.

Enrique siku nembiak degree ba pengawa Komunikasi Massa ba Universiti Putra Malaysia (UPM) sereta masuk tim nasional.

Pengudah Sukma, iya deka ngambi peresa nasional ungkup Pekit Terejun Tebuka Malaysia.