Ensera 2 : Apai Sali merau ngena kerubung lelabi

Tampung ensera…

NAMA agi deh udah kayu enggau duku nya disuaka Sali ngagai apai iya, dia Apai Sali lalu beguai guai mupuk madah kediri ka bira laban iya ti ka naban ke api ke lekat ba iku sirat iya nya ke tebing batang ai, ambi ke bisi dikena iya nunu lelabi ke dipeda seduai iya Sali tadi ti agi bedau tinggal dalam bubu.

Udah meh api nya ke alai iya bekindu nya tadi lekat ba iku sirat dia iya lalu nganggauka Indai Sali.
“Oh Indai Duat! Aku deka bira pedis amat perut tu chelap bai berendam ba ai sekumbang kami duai Sali ti ngabas bubu tadi. Seduai Sali anang nganti aku makai tengahari lagi,” pia ko Apai Sali bejako enggau bini iya, Enchelegit.

Nama agi deh nyau beguai guai Apai Sali tu tadi belanda naban ke api ti lekat ba iko sirat iya nya laban enggai ke api nya padam.

Datai ba tebing batang sungai enda jauh ari alai seduai iya Sali ngetanka tampun bubu ti pengabis besai nya tadi dia iya lalu beguai-guai ngenyadika api ngena api ti lekat ba iku sirat iya nya tadi ambi ke bisi di kena iya ngintu lelabi.

Udah nya Apai Sali lalu beguai-guai ga ngangkatka bubu ari tampun lalu munuh lelabi nya tadi sereta mela iya.
Udah Apai Sali ke madah kediri nurun bira ngagai Indai Sali dia Indai Sali lalu nanya Sali.

“Kati ku Sali, bisi bulih ikan bubu seduai apai nuan pagi tadi?,” pia ku iya.

“Bisi! bisi indai, bisi aku meda siku lelabi tadi besai bendar dalam bubu ti diangkatka apai. Tang apai madah ngagai aku nya ukai lelabi tang duan mengkubung,” pia ku saut Sali.

Ninga munyi nya Indai Sali pedis bendar ati, ninga Sali enggau iya ti udu dikemulaka Apai Sali ti madah ke seduai iya Sali pulai ngabas bubu nadai bulih utai.

Indai Sali lalu mai Sali bepekat nitih ke Apai Sali ngagai tunga seduai iya Sali ti ngetanka tampun bubu ke bisi bulih lelabi nya tadi.

Datai Sali enggau indai iya ba semak alai Sali seduai apai iya ti ngetanka tampun bubu nya dia Sali enggau indai iya meda Apai Sali nya tadi benung kiruh ngintu lelabi nya nengali. Indai Sali lalu mai Sali bepekat ngeluluka diri nyadi ngingit.

Sali enggau indai iya lalu belalai ba babas kira ke semeda ari alai Apai Sali ti nunu lelabi nya tadi. Sali enggau indai iya pan lalu berengkah ngelulu kediri munyi ngingit.

“Ngit! Ngit! Ngit! Ngit!. Meri aku pah lelabi nya sepiak! Enti nuan enggai meri, lagi aku kerebuk leka mata nuan,” pia ku Sali enggau indai iya ti ngelulu kediri nyadi ngingit ba babas nya. Apai Sali lalu takut ninga ngingit nya tadi lalu nimbal.

JOHN ADAM GILBERT

“Oh! Antu nama, antu apa kita nya bengat bam bangam, nemu bepintaka lelabi ti benung diintu aku tu. Enggai aku meri kita nya deh,” pia ku Apai Sali nimbal enggau nyawa ti naka iya pengingar. Indai Sali pan lalu nyaut madah kediri nya Antu Bunsu Ngingit.

Apai Sali pan naka iya penakut lebuh ti ninga Antu Bunsu Ngingit nya tadi ti minta pah lelabi ari iya. Iya pan lalu nadai runding sereta lalu beguai ngelampang pah lelabi nya sereta lalu ditikau ke iya ngagai tungga ari ni alai penatai munyi ngingit ti minta nya tadi. Udah nya Antu Bunsu Ngingit nya tadi agi ga bemunyi baru.

“Ngit! Ngit! Ngit! Ngit! Meri aku pah lelabi nya sepiak agi! Enti nuan enggai aku kerebok leka mata nuan sepiak da agi. Apai Sali pan lalu nyaut Antu Ngingit nya.

“Eh nadai aku tu ka meri nuan nya agi deh.” Antu Bunsu Ngingit nya pan lalu nyaut,
“Enti nuan enggai meri aku kerebuk kedua-dua piak ga leka mata nuan nya lagi,”.

Nama agi deh Apai Sali lalu naka iya penakut, lalu beguai nikau ka lampang pah lelabi sepiak da agi ngagai tungga Antu Bunsu Ngingit ti bemunyi nya.
Iya pan lalu beguai guai ga majak ngelampang lelabi nya sereta nyau ginyah-ginyah nguyas isi lelabi ke ditunu iya nya tadi laban enggaika abis di pinta Antu Bunsu Ngingit.

Tang enda lama udah nya iya lalu ngetu nguyas isi lelabi ke di intu iya nya laban Antu Bunsu Ngingit agi bemunyi baru. Lalu munyi Antu Bunsu Ngingit ke sekali tu iya nya,

“Ngit! Ngit! Ngit! Ngit! Aku ka minta semua isi burit lelabi nya ! Enti nuan enggai meri aku ambi telu pelir nuan sepiak. Apai Sali pan lalu ringat sereta nyaut Antu Bunsu Ngingit.

“Nadai aku tu ka meri nuan agi deh, ni ke empu aku ke ngulihka lelabi tu deh.”

Antu Bunsu Ngingit lalu nyaut, “Enti nuan enggai meri, aku ambi kedua-dua igi telu pelir nuan nya lagi.”

Nya meh Apai Sali nya naka penakut lalu beguai nikauka semua isi burit lelabi nya ngagai tungga Antu Bunsu Ngingit ti bemunyi nya tadi. Iya pan naka olih meh ngeruyas isi lelabi ke di tunu iya laban nemu diri sigi berebut enggau Antu Bunsu Ngingit.

Apai Sali pan enda olih meda enggau terang ngagai alai Sali seduai indai iya ti belalai nyadi Antu Bunsu Ngingit laban asap iya ti nunu lelabi nya balat bendar laban kayu ti dikena iya nunu nya basah.

Udah nya tadi lalu di kumbai Apai Sali udah rari Antu Bunsu Ngingit ti bepinta ke lelabi ari iya. Sekali dinga iya inggar agi ga munyi Antu Bunsu Ngingit nya munyi tu.

“Ngit! Ngit! Ngit! Ngit! Aku minta tubuh lelabi nya, enti nuan enggai kaki nuan sepiak nya aku gigit.” Apai Sali lalu nyaut madah kediri endang enggai meri agi. Ninga Apai Sali ke madah kediri enggai agi meri lelabi dia Antu bunsungingit lalu madah kediri ka ngambi kedua-dua piak kaki Apai Sali nya.

Apai Sali pan nadai ulih bejaku mayuh tang nurutka utai ti di pinta Antu Bunsu Ngingit. Lalu ke pengabis iya semina utai ke enda dipinta Antu Bunsu Ngingit nya ari Apai Sali iya nya kerubung lelabi aja.

Apai Sali pan nyau chukup lelak belanda kin kitu betikauka lampang lelabi nya ngagai Antu Bunsu Ngigit. Iya pan nyauka tengah hari dia iya lalu mulai kediri merau ngena kerubung lelabi laban ti nyau enda dapat agi bejalai tegal ti udah lelak sereta pedis betis.

Datai Apai Sali di rumah, dia iya lalu ninduk kediri laban ke lelak sereta ti udah madah ngagai Sali seduai indai iya ti enda ibuh nganti iya makai tengahari nya.

Lebuh ke tinduk Apai Sali jenak bendar sereta lalu bekuruh, lalu nyawa Apai Sali pan nyau ranggap-ranggap baka nyawa baya ti ngeradai ba tebing sungai.

Meda baka nya tudah Indai Sali laban ti agi pedis ati lalu mai mangkuk siti sereta mai penyiar penyapu kena iya ngulihka tingga ba selepak ngeli Apai Sali laban nyawa iya ti nyau ranggap-ranggap maya tinduk nya. Tingga Apai Sali nya tadi lalu dipanduk Indai Sali ngena periuk batu.

Iya meh nyau maya sida ka makai lemai dia Indai Sali lalu ngerak Apai Sali bebai makai lemai. Apai Sali pan lalu tedani serta nanya Indai Sali.

“Nama utai ke lauk kitai lemai tu deh Indai Duat,” ko iya. Indai Sali lalu nyaut.
“Bisi! Bisi Apai Duat, bisi aku manduk telu manuk dua igi tadi,” pia ku iya. Indai Sali lalu ngenahka Apai Sali makai. Apai Sali pan lalu belabuh ga makai lemai belauk ka tingga ngeli diri empu. Benung ke makai nya dia Apai Sali lalu nanya bini iya, Enchelegit.

“Nama asai telu manuk tu tak penat deh Indai Duat. Ti ngelama tu nyamai bendar asai telu manuk. Kada telu tu digulai nuan enggau garam deh tadi,” pia ko iya. Indai Sali lalu bejaku.

“Keba nuan tu tambap, nuan tu lap. Enda ga nuan nemu diri makai tingga diri empu. Nuan ga udu rangka makai lelabi nya nengali kediri,” pia ku tudah Enchelegit.

Apai Sali lalu badu makai tekala nya sereta pansut ka ruai. Iya udu ringat sereta malu kediri empu laban ti rangka makai lelabi ulih bubu seduai iya Sali nya nengali. Sali pan lalu ketawa nyau rakah-rakah bepichit perut ninga indai iya ti madahka apai iya bam makai lelabi nengali lalu makai belauk tingga diri empu.

Nyau udah nya baru Indai Sali nuang ka ruas pansoh lelabi ke ulih seduai iya Sali ngelulu ka diri nyadai Antu Bunsu Ngingit maia Apai Sali ti nunu lelabi.

Sali enggau indai iya pan lalu belabuh makai lemai. Ninga Sali enggau indai iya belabuh makai di bilik dia Apai Sali lalu beguai tama baru ke bilik lalu nuduk kediri enggau makai. Iya pan lalu tekenyit bendar ati sereta lalu nanya,

“Nama lauk tu deh? Pansoh nama tu deh? Nama tu tak baka pansuh lelabi enti enda saru aku ? Dini nuan bolih lauk tu deh Indai Duat?” pia ku Apai Sali. Indai Sali lalu nyaut.

“Lelabi ulih bubu ke ditanka aku ba nanga batang sungai di ili din,” pia ku Enchelegit.
“Essss! Nuan tu ke ngaga diri nyadi Antu Bunsu Ngingit pia?” Enti aku nemu nya nuan ka ke sekerat pa enda meh aku tu meri nuan tadi,” pia ku Apai Sali.

“Keba nuan tu tambap, lap, makai utai nengali kediri,” ku Indai Sali.

Ninga jaku Indai Sali munyi nya dia Apai Sali lalu ringat baru sereta pansut ke ruai lalu enggai enggau Sali enggau bini iya makai lemai nya.