TUSUN 40

BENDAR tudah Kumang ngusuk mata iya engka nya semina mimpi aja laban iya kelalu lelengau ke lelaki nya.

Lelaki ti udah lama disangka iya parai. Amat! Lelaki nya duduk sepiak iya.

“Oh….” ku Kumang, “enti sida ke udah parai tau datai baru, nuan amat sebaka gamal enggau niang tunang aku.”

“Pekara nya enda ulih nyadi! Nadai guna kitai bejaku ke sida ti udah parai. Kitai mega deka parai nitih ke sida ila,” ku saut Keling.

“Aku deka nemu sapa nuan? Nuan udah ngelese sereta ngemelika aku ngelama tu enggau chara belalai tang aku udah selabuh sayau ke nuan.

“Ba penemu aku, aku patut nitih ke nuan pulai ke rumah enti nuan pulai pagi pagila,” ku Kumang.

“Nuan sigi dilalu nitih ke aku enti nuan nemu jalai,” pia ku saut Keling.

Enda lama udah nya, Kumang lalu muka gelang iya lalu ditanchang ke iya ba kuan Keling. Udah nya, iya pen bejaku baru.

“Awak ke utai tu nyadi tanda pengerindu tua,” ku iya.

Udah nya, seduai berengkah berandau pasal pengerindu seduai nyentuk hari nyau kerebak tawas.

Enda lama udah nya, manuk sabung berengkah engkukok ba ujung tanju rumah panjai sida.

Bala jani pen nyau berengkah meruik ba sebelah baruh rumah minta makai.

Orang tuai endang baka selama berengkah dani. Sida angkat lalu bekindu ba bedilang alai nyalai antu pala.

Dani bala indu dara biak lalu nyengkau genuk sereta bebai ke labu nurun nyauk ai ari sungai Gelong.

Bala burung ba sebelah puchuk kayu pen berengkah kekichau nandaka mata panas deka ayan enda lama da.

“Enda berasai, udah siang hari! Jampat amat jam beputar,” pia ku Keling.

“Aram mih tua sama nurun. Aku deka berapi lalu nuan duduk ba ruai ke bisi dianchau tikai dia,” ku Kumang nyaut.

Enda lama udah nya, seduai bela nurun ari sadau.

Gelayan ke tinduk jenak ba tisi nya tadi agi enda engkebut sereta enda meda seduai nya nurun ari sadau.

Lebuh seduai datai ba baruh, Kumang lalu mansang ke dapur sereta nungkun api.

Lebuh api dapur udah terang dipeda, iya berengkah ngiga orang ke udah nemuai ngagai iya malam nya.

Tang sayau, iya nadai meda orang tauka sapa-sapa ba bilik enggau ruai sida.

Iya agi enda tepantup ati, nya alai, iya mansang ke tanju ba mua rumah panjai sida ngiga lelaki nya tang lelaki nya nadai dia.

Lebuh Kumang mansang baru ke dapur, dia Keling ngerasukka kulit Pelai Tekalong Begetah.

Udah nya, iya berumban pansut sereta mulai ke diri ngagai Ngelai ke benung tinduk jenak ba atas panggau.

Nyadi Ngelai laban ke agi jenak tinduk, iya enda ngeleda Sebungkok datai dia.

Sebungkok lalu muka gelang ke ba lengan iya lalu ditanchang ba lengan jari Ngelai.

Enda lama udah nya, iya lalu ngali ke diri ba sepiak Ngelai.

“Oh unggal, Ngelai! Dani! Peda nuan hari nyau teberingkas tawas, penampak siang nyau manchar terang.

“Uji peda lengan nuan nya bisi gelang!” ku Sebungkok ngelara lengan Ngelai ke bisi ditanchang gelang.

“Kati nuan madah ke diri enda rindu berandau enggau indu dara tauka ngayap! Nya bukti nuan bisi ngayap indu dih.”

“Gelang nama nya?” tanya Ngelai sambil angkat ensugau.

“Nya mih, gelang ke ba kuan nuan nya. Nya meseti diberi indu!” ku Sebungkok.

Ngelai nudukka diri belubah-lubah lalu ngusuk mata iya.

Udah nya, baru iya tepeda ke gelang nya, iya ngelempaika jari iya ba panggau sereta nguji muka gelang nya tang gelang nya enggai nyadi dibuka.

Bendar amat mih tudah tuai nguji muka gelang nya tang mih enda ulih.

“Aku nadai kala ngayap ngagai sapa-sapa indu! Nadai orang meri aku gelang tu!” pia ku saut tudah Ngelai.

Iya iran ati kati gelang nya tau lekat ba jari iya dia. Puas iya betanya kati pekara nya tau nyadi.

“Tang nya gelang indu dara!” ku Sebungkok madah ke Ngelai.

“Nuan selalu nguji manjuk aku enggau pengawa nuan ke nurun ngayap Kumang,” ku Ngelai.

Baka selama, lebuh enggau Sebungkok, Ngelai ngenang Sebungkok begulai enggau Kumang.

Tang lebuh iya begulai enggau orang bukai, iya nyau enda ingat agi nama utai dikenang iya.

Kebuah pia laban Sebungkok bisi macha puchau ngagai iya.

“Aku bisi meda indu dara nya tadi,” ku Sebungkok.

“Maya nya aku ngaga diri baka ke benung tinduk jenak, iya datai enda bemunyi lalu nanchang gelang nya ba lengan nuan,” ku tusui Sebungkok tang nya bula.

“Sapa bagi orang nya dih?”

“Aku enda nemu laban mua iya enda tentu berupai dipeda.Aku balat ngantuk maya nya.”

Nyau pemuas udah nya, Ngelai pen mujur muka gelang ba lengan iya lalu ditikau ke iya jauh.

Enda lama udah nya Kumang lalu bejalai nurun mandi lalu tekala nya iya tepeda ke gelang iya bisi ba gelegar ruai sida Ngelai.

“Huh? Nama nya baka gelang ke diberi aku ngagai orang ke nemuai demalam,” pia ku iya bejaku kediri dalam ati.

“Empating!” ku iya ngangau ke Lulong ke bisi dia ba belakang iya. Nya siti agi nama dikena seduai ngangau ke pangan diri.

“Peda nuan nya, Empating! Nya mih gelang aku!”.

Kumang lalu ngambi gelang nya ba gelegar ruai sida Ngelai.