TUSUN 39

LABAN Kumang nitih lalu nama kediri ngagai bilik sida Ngelai sereta duduk semak iya, dia Ngelai nyau enda ulih nyaut agi lalu tubuh iya balat begetar tegal tabin.

Iya ti duduk dia tadi pen nyau deka rebah ari penuduk tang Sebungkok mujur ngenan ke iya lalu iya enda nyadi rebah.

Meda ulah Ngelai baka nya, Sebungkok semina ketawa geli ati.

“Heh! Heh! Heh!” ku Sebungkok ketawa ke tudah Ngelai.

Enda lama udah nya, indai Ngelai pen bejaku enggau Kumang.

“Peda aja iya endu. Sigi pengawa iya nya pama semak indu.

“Pasal nuan deka nama kediri ke bilik kami, aku sigi nadai jaku bukai endu. Nya ke manah, sigi dipinta, sigi ditanya.

“Enda ibuh aku madah kediri empu setuju, penatai nuan ke bilik kami sigi dikelalu ke aku endu.

“Laban ba aku, nuan nya nyau baka anak indu aku empu.

“Taja pia, aku bisi pengirau endu, baka ni seduai deka begulai baka melaki bini? Baka ni nuan deka nyadi menantu aku?

“Indah sebedau seduai jadi, semina duduk semak iya aja dih iya deka luput lalu tabin.

“Peda nuan pendiau tudah Ngelai, endu, mimit nadai mih aku nyangka iya tau ngabas tauka negu nuan.

“Baka ni mih aku ulih ngarap seduai jadi melaki bini?” pia ku indai Ngelai bejaku. Udah nya, iya nampung baru.

“Aku sigi ngelalu ke nuan tama ke bilik kami, naka mih pengaga ati aku nyema nuan amat nyadi ke menantu aku, endu.

“Tang enti aku nerima nuan, Ngelai deka tabin lalu luput sereta tau ngujungka iya parai,” ku indai Ngelai nyau sinu.

Lama agi Kumang enggau Lulong duduk semak iya, Ngelai nyau raya agi sakit. Iya pen nyau majak seseput deka luput.

Meda baka nya, iya pen dibai orang mindah ke bukai jauh ari Kumang enggau Lulong. Iya dibab ngena pua lalu diasuh bekindu ba unggun api.

Nyadi Sebungkok duduk sepiak lalu ngaga diri batuk.

“Nuan patut nerima iya,” ku Sebungkok ngelalau Ngelai sambil niup api ngambi mau agi dikena ngangatka tubuh siku nya. Udah nya, iya nampung baru.

“Baka ni nuan ulih nulak sereta malu enti bisi indu dara nitih ke nuan kitu?”

“Nama reti jaku nuan, ngemalu iya?” ku tanya Ngelai.

“Peda! Aku tu nyau deka mati enti semak iya. Enti nuan deka, nuan mih jadi enggau iya!” ku tudah Ngelai nyaut Sebungkok.

“Dinga nuan endu!” pia ku Indai Ngelai bejaku enggau Kumang.

“Baka ni iya ulih jadi enggau nuan, endu? Baka ni ku aku ulih nyambut nuan tama ke bilik aku lalu nyadi ke menantu aku?

“Aku ukai enggai nerima nuan ke menantu, endu tang nama daya aku, enti semak nuan, Ngelai nyau tabin lalu deka luput.

“Nya alai, anak, ba penemu aku, manah agi nuan pulai ngagai bilik penaik kita empu. Anang jadi enggau Ngelai.

“Buai aja iya ari pengingat pemalu nuan nya.”

Pengudah ningaka jaku indai Ngelai munyi nya, Kumang pen berunding panjai. Bisi ga pengamat jaku indai Ngelai nya.

Enda lama udah nya, iya enggau Lulong pen mupuk mulai kediri ngagai bilik sida empu.

Seduai kelebih agi Kumang mai ati sinu, asa enggau temati kutu. Bemacham pengasai nundi iya.

Iya agi ingat ke jaku indai Ngelai ti ngasuh iya badu agi ingat kediri ti deka jadi enggau Ngelai.

Malam nya, lebuh semua orang udah jenak tinduk, Sebungkok bejalai napat ke bilik sida Kumang baru.

Datai iya ba peninduk Kumang, iya lalu ngerak siku nya dani. Ngeleda bisi orang ngerak iya, Kumang pen tedani.

“Alit amat ati aku meda orang tu,” ku Kumang bejaku dalam ati.

“Enti ari gaya Ngelai pagi tadi, tentu orang tu ukai Ngelai.

“Chukup alit ati aku meda orang tu ti enda dikelala. Tentu orang tu ukai Ngelai tang pen iya ngaku diri Ngelai.

Laban iya apin ngelala identiti orang ti ngayap iya, nya kebuah Kumang keran amat deka nemu sapa bagi orang nya ti udah ngasuh iya malu.

Kumang ngidupka lampu kelita ngambi ulih meda mua anak temuai nya ti enda ngetu ngayap iya.

Lampu kelita ti diidupka Kumang nya manchar nerangka ruang nya tang disepu orang ti ngayap iya nyentuk padam baru.

Taja pia, Kumang sempat meda mua lelaki ti suah ngayap iya ti nyau deka bejurut malam.

Lebuh tepeda ke mua lelaki nya, seput Kumang asai ti padam tekala nya, iya balat tekenyit, mua iya puchat baka ti udah meda antu, jari iya gegetar, dada iya deras berenjun.

Iya mampul mulut iya ngena tapa jari seraya agi enda pechaya ke utai ti baru udah dipeda iya tadi.

Iya chukup ngelala mua orang nya. Mua ti udah lama deka dipeda iya. Lelaki ti udah lama digiga iya ti dikumbai iya lenyau udah midang laya sulai ngelama tu.

Bendar tudah Kumang ngusuk mata iya engka nya semina mimpi aja laban iya kelalu lelengau ke lelaki nya. Lelaki ti udah lama disangka iya parai.

Amat! Lelaki nya nyata duduk ba sepiak iya.