Etnik Revolution ngidupka Cai Cer Ruai

SIBU: Seraban pengemeran muzik asal kontemporari, Etnik Revolution (ER) mujur ngelancharka muzik video single keterubah sida bejuluk Cai Cer Ruai.

Pengawa udah diatur di Mak Borneo Smokehouse – De’ Vulture Cafe di Sibu kena 24 Mei tu tadi urung pukul 7 malam lalu nerima sambut manah amat.

Teknologi tinggi

Pengari sida sebuat madahka muzik video pengelama 4 minit 59 sikin ditengkebang Braden Tiong ari Tempting Heart Of Borneo Studio ti bepenau sentang teknologi tinggi.

Single Cai Cer Ruai tu berengkah ditengkebang dalam taun 2017 lalu diatu tau didinga enggau dipeda nengah muzik video.

Direktor Braden ngena pemintar runding, pengelandik enggau penau iya sentang teknologi tinggi begulaika tiun, leka lagu enggau perampa, chukup dipuji.

ANGKUNKA RAMPA MENUA…. Raban ER ngambi gambar ungkup muzik video Cai Cer Ruai dikelingi menua ke agi diayung kampung.

Pengepuh iya ngembing bala kami bemalinka perampa ditibak ari penemu sereta buah randau begulai nentuka pemujur muzik video ti bisi kualiti sereta nipakka ubah jeman.

Sada anak Dayak

“Pengawa ngambi gambar dipejalai kena 20 April tu tadi ba dua endur, di Pasai Siong Ili enggau Bawang Assan di Sibu.

“Kami sebuat milih kandang menua kampung ti agi diayung rampa menua asal nipakka kelulu muzik dibai iya nya Feel The Rhythm Of Rainforest Music,” ku iya nerang.

Ku iya ngelansa, Cai Cer Ruai tu pasal lagu ti suah disada sida ke nembiak mit bansa Dayak, lebuhka bebuti enggau bebakih di rumah panjai dulu suba ti diatu majak lenyau.

ANGKUNKA RAMPA MENUA…. Raban ER ngambi gambar ungkup muzik video Cai Cer Ruai dikelingi menua ke agi diayung kampung.

“Tu mih penyelai ER ti milih lagu tengkebang keterubah diambi nyadi muzik video ke alai kami ulih ngemayuhka bansa tiun bemalinka gaya asal kontemporari,” ku iya.

Tabi puji mega ngagai Harriecthmond Albert Bennet ti landik nengkebang leka lagu Cai Cer Ruai.

Sukung muzik asal

Nya kebuah iya nesau sereta meransang semua peranak menua tu bela sampal meri sukung ngagai sida sebuat ba pengawa ngangkatka muzik asal kontemporari.

“Sukung kita ngemai reti besai ba pengawa kami ngidupka baru lagu asal kitai tu.

“Kami mega ngarapka penatai raban kami deka ngerichahka agi seni muzik sereta pengawa ngintu Gawai Dayak ngena tebah sape enggau kereban muzik bukai ti ranchak,” ku penerang nya nampung.

Raban ER mega meri besai terima kasih ke sukung enggau kerejasama Tuai Rumah John Anting enggau sida serumah di Pasai Siong Ili sereta Tuai Rumah Abell enggau nembiak redak iya di Bawang Assan Sibu.

“Sukung enggau saup semua bala ke nyenggala dipeda enggau ke enda deka dikenang kami lalu pemujur ngidupka lagu tu asil ari sukung tegut semua,” ku penerang nya.

Ngemegah Nama Sarawak

ER kala bulih gelar champion ba Borneo Talent Awards (BTA) dalam taun 2013 di Sibu enggau menggi gelar champion Waterfront Music Fest 2018 (Kuching).

Raban tu mega kala dikangau merindang di Xiamen, Fuzhou di China dalam taun 2012 beserimbai enggau Program Delegasi Pertukaran Budaya Malaysia-China.

Kelimpah ari nya, sida mega suah dikangau merindang ba pengerami besai baka Kenyalang Journalism Award 2018 di Sibu sereta mayuh atur pengerami bukai.

Pengada Etnik Revolution

ER ditumbuh ditumbuh dalam bulan November 2011 ti ngempung tiga iku diri menyadi, Robin Albert Bennet nyadi pemain Sape/Seruling, Hendry Albert Bennet ke nebah gitar bass enggau Harriecthmond Albert Bennet nebah gitar akustik.

Seraya kaban bukai iya nya Wat Ngelai Juan nebah Cajon/Dram Floor Tom, Peter nyadi Vokalis enggau Watt Zack megai pangku pengawa Media enggau Rainforest Sound Effect.

Kesemua sida ngembuan penau ti bebida tang bisi juluk ke sama iya nya ngangkat enggau ngemai muzik asal Borneo ngagai tikas tinggi agi kelimpah ngelakuka main asal kitai bansa asal.

Muzik video Cai Cer Ruai udah ulih dipeda ba Youtube kenyau ari 24 Mei lalu udah dibantai nengah Facebook berengkah ari ensanus, 27 Mei ba website https://www.facebook.com/etnikrevolution/ tauka Instagram https://www.instagram.com/etnik_revolution/.

Sebarang penerang enggau tanya silik tau telefon nuju Peter Aaron ba lumur 019-8486968 enggau Lau (019-8161166).