KUCHING: Pemujur Filem Belaban Hidup tu deka nyadi singkang keterubah lalu ngerandang jalai ngambi mayuh agi Filem Dayak dipandang dudi hari ukai semina ba menua tu aja tang mega mujur rembus ngagai tikas dunya.
Nya mih jaku dikenatai penulis skrip Filem Belaban Hidup, Misha Minut lebuh dirandau pengudah Filem Belaban Hidup: Infeksi Zombie tu menang baru ba Festival Filem Paris di Peranchis.
Udah tu, Misha merambu deka ngaduka cherita ngempung pelakun menua enggau menua luar.
Bekaul berita baru, iya madahka diatu iya benung ngaduka telemovie Kaban ti deka dipandang ba TVS.
Ku iya, pemujur Filem Belaban Hidup tu nentuka mayuh agi peluang kitai Dayak nyadi pelakun, produser enggau direktor sereta pengawa bukai pasal industri kreatif.
Filem Belaban Hidup tu mujur bulih Anugerah Best Horror tauka dikumbai kitai Anugerah Filem Berantu Pemadu Manah ba Festival Filem Paris malam (31 March) tadi.
Lebuh dirandau Suara Sarawak, Misha Minut ke mega pemantu direktor ba produksi tu madahka diri berasai gaga sereta temegah laban Filem Dayak tu sekali agi diaku ba tikas entarabansa.
Berita penuh ba surat kabar Suara Sarawak pagila.
