Filem nerenak pemereti ati Jipun – S’wak

KUCHING: Festival Filem Jepun (JFF) 2019 ti deka dimain ba Kuching beguna amat dikena nerenak pemereti ati entara menua Jipun enggau Sarawak nengah filem ti deka dimain.

Menteri Dagang Temuai, Seni enggau Main Asal, Datuk Abdul Karim Rahman Hamzah madahka JFF ke udah diatur lapan taun bejurut nya mega tau nyadi siti agi pengerami pemerindang ti dianti peranak menua tu enggau temuai bukai.

Ku iya, Sarawak kelebih agi mengeri Kuching udah nyadi pematak temuai enggau bemacham pengerami besai ti udah diatur ba taun ke dulu sereta chakah ngelakuka daya idup, pejalai matau menua, pemanah enggau penyelai rampa menua asal, pemakai enggau pengerami bukai.

“Pengelebih ari penyelai daya idup, seni enggau main asal nyengkaum pemakai dikembuan menua kitai mujur matak penatai temuai ukai semina ari Malaysia tang mega menua luar bukai.

“Menua kitai semampai richah enggau bemacham pengerami renggat entarabansa ti dikerindu semua kelebih agi diatu kitai chakah bejalaika kimpin Taun Nemuai Ke Sarawak (VSY) 2020,” ku iya nerang.

Abdul Karim mansutka jaku nya beserimbai enggau Pengawa Bejadika Festival Filem Jepun 2019 ba palan besai bebelika barang City One Megamall Kuching, ditu tadi.

GAGIT… Datuk Abdul Karim (tengah) disempulang Ketuai Pemesai Eksekutif Mitsubishi Corporation Malaysia, Ichikawa Genichi enggau bala ketuai dipebasa bukai pengudah Pengawa Bejadika Festival Filem Jepun 2019 ba palan besai bebelika barang City One Megamall Kuching, ditu tadi. Gambar NADIM BOKHARI.