SARATOK: Pekara pemansang rama patut semampai nyadi fokus genap pengari rayat ke udah dipilih pengundi ba sitak diri.

Sapit Menteri Pengeluar Kuasa enggau Pengeraja Asal ke mega Kaban Parlimen Saratok, Ali Biju madah, sedarka rayat randaka pemansang ngujungka iya naka ulih nangkup genap peminta sida.

Ku iya, pekara tauka semaya pemansang digaga enda ulih dimain laban deka ngasaka ati rayat ti udah ngelempaikan pengandal bejakuka peminta sida ba renggat Perintah Besai.

“Tuju rayat ke milih kitai laban sida pechayaka kitai ulih ngarika sada sida, mai peminta renggat baruh ngagai piak ke patut.

“Ari nya kitai enda tau ngelebu sida lalu nya mega kebuah aku meruan nyukung perintah ke bisi diatu,” ku iya.

Jaku Ali dikenataika nengah pengari iya, Jeti Kumpai rambau pengawa nyuaka chek Projek Mit Pemansang Menua Pesisir (MRP) ba Rumah Mawan, Kawit di Melupa sehari tu.

Komiti Pemansang enggau Pengelikun Genturung Pendiau (JKKK) rumah panjai nya nerima agih belanja penyampau RM15,000 dikena bejalaika aktiviti pemansang ba rumah panjai sida.

Nya alai, Ali ngarapka rayat Rumah Mawan ulih ngena manah agih belanja diberi nitihka peminta sida suba lalu deka mai pengelantang ngagai sida serumah.

Sama datai Chairman Gerempung Bansa Dayak Sarawak (SDNU) Pampang Saratok, Alexander Sela.