KUCHING: Gaya tikas ai Sungai Sarawak seruran dipatau ngena sistem telemetri gerah tumu bah dikena matau ai ke tama dikena nyeliah penusah bah raya agi tau nyadi.
Sapit Premier Sarawak, Datuk Amar Douglas Uggah Embas madah, nya berindik agi bah suah nyadi lebuh ai pasang raya besatup enggau ujan bangat ke enda ngetu.
“Nya kebuah tikas ai ba Sungai Sarawak enggau tikas ai una seruran dipatau nengah bilik ngatur pengawa Komiti Penyangga Penusah Nengeri (JPBN),” ku iya.
Uggah bejaku munyi nya lebuh dirandau pemberita ba Balai Raya Kampung Sinar Budi Baru ditu kemari ke alai Sapit Premier Sarawak, Datuk Amar Dr Sim Kui Hian sama bisi dia lebuh nya.
Nya alai ku iya, Perintah Sarawak nengah Gempung Parti Sarawak (GPS) seruran naka ulih nentuka pengelantang sida ke tasah bah dijaga meruan kelebih agi sida ke diasuh diau ba Palan Ngenduh Sementara (PPS).
Naka berita tu ditulis, bisi tiga PPS bah udah disedia endur sida ke tasah bah diau iya nya ba Kampung Sinar Budi, Desa Wira Lorong Si enggau Kampung Segong.
Uggah ke mega Chairman JPBN madah, sebuah PPS udah disedia di Bau enggau dua di Kuching.
“Aku chukup lantang ati meda penyikar Raban Penyaga Orang Periman (APM) Sarawak, Opis Bomba enggau Penyah Penusah (Bomba) mantu sida ke tasah bah.
“Pia mega pemakai udah disedia lalu kami naka ulih nentuka bala nembiak mit enggau sida sebilik meruan pemakai.
“Susu anak mit mega bisi disedia laban nya endang beguna maya jam tasah baka tu,” terang iya.
Kelimpah ari nya, Uggah nyemetaj madah ke bekal pemakai enggau kereban peninduk baka tilam udah disedia nyengkaum bala lutur dianjung kia ngambi meresa enti sema bisi pesakit kena rampit igi penyakit COVID-19.
