BAU: Sarawak benung ba jalai ti betul dikenuku nyadi Geopark Global UNESCO, laban nyambung siti geopark enggau geopark bukai di serata dunya.
Premier Sarawak, Datuk Patinggi Tan Sri Abang Johari Tun Openg madah, peluang strategik status Geopark Sarawak tu deka meri pemaik ngagai menua.
“Uji kita meda, menua kitai udah dichalun status Geopark Global UNESCO. InsyaAllah, enda lama da ari diatu
. “Naka diatu, semina Kuching ti dikenuku nyadi Geopark Global UNESCO,” ku iya.
Abang Johari bejaku munyi nya ba pengerami bejadi Tebing Sungai Siniawan, ti diatur beserimbai enggau Pengerami Muzik Bagi Menua Siniawan, ngintu genap taun ke-185 penumbuh Pasar Siniawan enggau ngintu taun ke-15 Pasar Malam Siniawan ditu, kemari.
Ku iya, geopark nya mega nyerangkung sekeda bagi menua Bau nyengkaum Siniawan enggau Serian.
“Kandang menua tu (Bau enggau Serian), palan ti nyelai, deka narit perati dunya laban nyadi sebagi ari rentayan Geopark Global UNESCO,” ku iya.
Abang Johari mega merambu Geopark Sarawak sebaka enggau Pulau Jeju di Korea Selatan, siti geopark ti tebilang lalu diaku UNESCO. “Uji kita meda Korea, geopark sida ba Pulau Jeju.
“Kitai bisi AirBorneo. Kitai ulih mandingka Korea enggau Geopark Sarawak.
“Tu utai ti deka dipandang kitai ngagai komuniti global,” ku iya.
Iya madah baru, runding ti berani ngatur strategi pemansang Sarawak berindik ari pengawa ngaku Geopark Sarawak ba dudi hari.
“Kitai patut jauh tinjau. Pengudah status UNESCO dituku, tu deka nyadi jalai ari siti menua ngagai siti menua ti nyadi penyambung bukai.
“Kitai deka nyadi sebagi ari jalai geopark, ti ulih matak sereta ngubah ekonomi menua tu,” ku iya.
Sebedau tu, Geopark Delta Sarawak udah diberi Status Kad Gadung (Diterima) ari Kaunsil Geopark Global UNESCO.
Pemutus nya deka dibantai ngagai Kaunsil Eksekutif UNESCO ngambi diberi pemendar kepenudi sebedau palan nya rasmi dikenuku nyadi Geopark Global UNESCO.
Kelimpah ari nya, Abang Johari mega madah kediri ngemendarka semua projek pemansang ti deka dipejalaika di baruh Ejensi Pemansang Koordinasyen Greater Kuching (GKCDA) bagi sitak Serembu.
