KUCHING: Perintah Sarawak nengah Unit Pekara Pengarap Bukai (UNIFOR) udah ngagihka belanja RM1,000,000 ngagai Gerija St Ann dikena ngemujur pengawa nirika gerija nya.

Kaban Kunsil Nengeri (ADUN) Batu Kitang, Datuk Lo Khere Chiang madah, bantu nya dikena mantu Gerija St Ann nampung juluk sida.

Ku iya, asil bantu nya deka dikena sida nyapai juluk iya nya nyendiaka palan inklusif ungkup semua komuniti.

“Bantu tu ukai semina mantu nembuka pengawa nirika gerija nya tang mega meri semangat ngagai komuniti,” terang iya.

Nambahka nya, iya meri terima kasih ngagai UNIFOR laban udah meri sukung sereta penyiru meransang penyerakup.

Ku iya, pemanah ati enggau penyiru dibantaika UNIFOR nya bukti kuasa kerejasama enggau empas positif ti ulih dijapai pengudah bela bekerejasama nyapai tuju ti sebaka.

Nya alai, iya meri terima kasih ngagai UNIFOR sereta ngarapka kerejasama tu ditampung ke pemaik semua.