Giga utai bukai nyilih plastik

KUCHING: Tebal agi kitai di dunya tu enda sedarka kambut plastik ulih munuh chara belalai taja enda berupai tajam enti udah kelalu mayuh.

Ba pengidup kitai besehari sehari asaika bisi penimpang enti nadai kambut plastik kelebih agi maya bebelika barang sebelah makit enggau endur bukai.

Taja penerang pasal kambut plastik tau ngeruga pengelikun enggau enda manahka pengerai seruran ditabur, tang kitai baka enda ibuh lalu majakka ulah bekenaka iya.

Suara Sarawak bisi nanya penemu sida ti bedagang ngena kambut plastik ninting hari enggau bala bukai sentang pekara tu.

Suriani Halik, 29 taun, bejualka kuih madahka naka diatu kambut plastik enda ulih dikelaung lebuh bedagang.

Suriani Halik

“Kambut plastik tu enda tau nadai laban nadai utai bukai ti engkeman dikena nyimpan utai dijual.

“Taja ngeruga rampa menua tang aku ngarapka bisi chara bukai ti engkeman agi nyeliah ari bekenaka kambut plastik jemah baka kimpin ngemai kantung enggau bakul kediri maya bebelika barang,” ku iya.

Ku iya, diatu muntang agi nibarka jaku tesau ngagai rebak baru nemu pasal penanggul tu laban ulih ditesau nengah media rama.

Kelimpah ari nya, Margaret Kalim, 32 taun, bepenemu mensia mayuh rindu agi ngena kambut plastik laban barang disimpan enda basah ngapa.

“Sagam ati aku, ketegal rega mudah enggau barang disimpan enda basah ngasuh kitai rindu agi ngena kambut plastik tu.

Margaret Kalim

“Taja pia, mayuh orang enda sedarka kambut plastik tu tau munuh belalai laban ngundan ‘tosik’ enggau ‘bahan pengawet’.

“Nya alai kitai enda tau enda bekerejasama ngurang lalu badu agi ngena kambut plastik tu.

“Kebuah pia laban, enti sema perintah aja bebendar ngatur kimpin tang nadai kerejasama ari kitai, pengawa tu semina deka masau jam aja lalu enda nyapai tuju,” ku iya madah nyemetak.

Margeret mega ngarapka mensia mayuh ulih berunding lalu badu ngena kambut plastik tu laban tau ngeruga pemeresi rampa menua enggau kandang tasik menua kitai.

“Nyauka genap ujung minggu ba palan bebelika barang diatu ngasuh kitai mayar 20 sen ke siti kambut plastik. Kitai patut belajar ngelimat belanja sereta ngajar enggau nelebaka diri sebilik bebaika kantung kediri,” ku iya nandu.

Chela Nuri Michael, 24 taun, ti seruran ngena kambut plastik madahka diri napi pemar muai ulah baka nya.

“Kami endang bekenaka kambut plastik maya bebelika barang ba kedai enggau tamu.

“Ba penemu aku, pengawa bekenaka kambut plastik endang patut dikurang laban enda manahka ekosistem dunya.

“Kelimpah ari kimpin baka ‘Katakan Tidak Kepada Plastik’, kitai mega patut ngajar bala anak mit anang ngena plastik maya meli barang baka diatu kitai udah berengkah ngena straw ari keretas,” ku iya.

Chela Nuri Michael