KUCHING: Kaban Kunsil Nengeri (ADUN) Tamin, Ir Christopher Gira Sambang merambu lapan penuduk DUN baru ditambah ba sitak Selangau di baruh Rang Undang-Undang Kunsil Nengeri (Komposisi Kaban) 2025.
Iya mega merambu ngambika siti penuduk parlimen baru iya nya Bukit Buan patut dipechah ari sitak Kakus enggau Tamin ari adan Parlimen Selangau.
“Entara penuduk ti diperambu iya nya Bukit Kelangang, Mapai/Sibu Jaya, Bukit Arip, Tubau, Pengejau, Medamit, Anau enggau Sungai Plan.
“Perambu tu digaga bepelasarka agih penyampau pengundi ti dipeda ba sukut geografi enggau penyauh kandang endur nya ti begunaka pengari enggau perambu pemansang ti manah agi,” ku iya.
Gira bejaku munyi nya lebuh mantaika jaku sukung iya ngagai RUU (Komposisi Dewan Undangan Negeri Sarawak) 2025 ba Aum Khas DUN Sarawak ditu, kemari.
Ku iya, kenyau ari pengawa nusun baru sitak pengawa bepilih ba taun 2014, Sarawak udah beratika penambah penyampau tubuh ti nyata, kelebih agi di menua pesisir.
Tandu iya, tambah infrastruktur enggau pemansang ekonomi di baruh Premier Sarawak, Datuk Patinggi Tan Sri Abang Johari Tun Openg enggau Perintah Gempung Parti Sarawak (GPS) meri perati ba pengawa meri servis ngagai sitak ti besai sereta mar dilawa.
“Ambi ke chunto, kandang endur aku di Tamin mungkur lebih 3,472 kilometer (km) persegi ti diuan lebih 23,000 pengundi kelebih agi sida ti diau ba kandang endur ti bebukit sereta tusah dilawa.
“Pia mega, sitak Parlimen Selangau diatu mungkur lebih 9,193 km persegi lalu ngarika lebih 45,700 pengundi, ngasuh pengawa meri servis pengari rayat enda efektif enggau mayuh pemar.
“Nya alai, tambah penyampau pengari rayat deka nentuka sada nyawa semua komuniti lebih sebela sereta adil baka pengawa meri servis lebih efektif, kelebih agi di menua pesisir Sarawak enggau akauntabiliti demokratik ti tegap dalam meri kuasa ngagai kandang menua,” ku iya.
