Hak imigresen lenyau nyema dikuasa PH

KUCHING: Perintah Sarawak ulih lenyau kuasa imigresen nyema perintah Pakatan Harapan (PH) ngambi penuduk Gabungan Parti Sarawak (GPS) megai perintah nengeri.

Perkara tu dipansutka Kaban Parlimen Petra Jaya, Datuk Seri Fadillah Yusof lebuh bejadika pengawa nangguh Licha Sempekat Malaysia 1963 (MA63) Renggat Parlimen Santubong ba Penview Konvensyen Centre (PCC) Demak, kemari.

“Anang sesekali ngasuh sida (PH) masuk ngagai Sarawak laban nya semina deka ngeruga mayuh hak Sarawak udah tu.

“Uji kita merati nyema PH ulih masuk ngagai Sarawak utai keterubah ti deka dikinsil ke sida iya nya kuasa Imigresen lalu orang luar ulih peneka ati keluar masuk ngagai Sarawak,” ku iya.

Fadilah nekanka, hak rayat Sarawak patut dimerat ngambika tetap teguh.

NERANG…Fadillah benung mantaika jaku lalau ngagai mensia mayuh ke bisi ngulu Licha Sempekat Malaysia 1963 di PCC Demak, kemari.

“Bala GPS ari semua piak besatu ati nusi pasal ngetan ke pengawa nyaga hak Sarawak ngagai mensia mayuh di menua tu.

“Pengawa bepilih Sarawak (PRN) ti deka datai penting dikena ngetan ke masa depan rayat enggau menua Sarawak,” ku iya.

Kelimpah nya, Fadillah madah kebuah GPS keran deka nepu pekara Sempekat Malaysia (MA63) dalam ubah Kontitusyen Perintah Besai pekara 1(2) laban nya ti sigi ngetan ke hak Sarawak.

“Menua kitai udah mayuh lenyau kuasa ngelama tu nyadi ubah contitusyen tu ila deka meri pemaik ngagai menua Sarawak nyema perintah besai ulih nerima runding ngemasuk ka sempekat MA63 tu ila.

“Kepala Menteri Sarawak sigi enda belembut enggau sebarang orang ti nguji deka ngeruga sempekat tu,” ku iya.

Nangkan ke nya, iya madah enda nangi disebut ‘nadai guna’ nyema pengawa sida ngetan ke sempekat nya ulih meri pemaik ngagai hak rayat Sarawak.

“Nya alai, aku ngarap ka rayat Sarawak deka nyukung GPS ngetan ke penuduk diatu ngambika hak enggau kuasa kitai menua tu enda lenyau.

“Anang pechaya ke berita sebubu ngapa ari PH ti deka ngachau kereja manah ngetan ke menua tu,” ku iya.

Sama bisi datai Kaban Parlimen Santubong Datuk Seri Wan Junaidi Tuanku Jaafar, Adun Pantai Damai Datuk Dr Abdul Rahman Junaidi, Adun Tanjung Datu Datuk Amar Jamilah Anu enggau Adun Demak Laut Dr Hazland Abang Hipni.