KUCHING: Bansa Dayak ti deka ngintu pengerami Hari Gawai diperansang ngena peluang nya ngedut pemanah kaul enggau semua orang.
Bishop Kuching enggau Brunei Darussalam, Reverend Datuk Danald Jute madah, Hari Gawai patut nyadi peluang manah dikena ngedut pemanah kaul kelebih agi raban Kristian ti ngintu pengerami nya.
“Aku ngena peluang tu meri Selamat Ngintu Hari Gawai 2023 ngagai semua bansa Dayak ti ngintu pengerami tu.
“Ngena peluang tu mega aku ngelalau semua kitai bejimat lebuh betengah ke jalai alun serta ngemerat pengelikun diri maya begawai.
“Pia mega, kitai patut ngintu Hari Gawai dikena ngedut pemanah kaul semua bansa enda ngira kitai Dayak, China, Melayu, India enggau ti bukai,” ku iya.
Danald mansutka jaku nya lebuh dipinta pemberita nibar jaku lalau beserimbai Hari Gawai enda lama agi pengudah Program Merekatka Begunan Parish Gerija St. Basil ba Batu Kawa ditu, sehari tu.
Ku iya, bansa Dayak mega diperansang begempung ngambi hari besai ti diintu nya meri pemaik enggau berekat ngagai nengeri Sarawak.
“Nya alai, bala menyadi semua, intu meh Hari Gawai kitai enggau manah sereta kemerat ke pengelikun diri.
“Aku ngarap kitai semua gayu guru, gerai nyamai, lantang senang sereta bulih berekat ari Tuhan Jesus Kristus,” ku iya.






