Pengudah lama nadai ayan ba dunya pemerindang, Abang Sukri Abang Aing tauka lebih dikelala enggau nama Hillary Kumang Malaysia diatu pansut baru enggau lagu solo diberi nama Ngiga Palan Penyangkai.
Penanyi asal ari Kampung Hilir, Sri Aman tu madahka lagu baru tu betabuh Balada ulih dipeda ba Channel Youtube Kumang Malaysia Entertainment ungkup bala peminat ti lelengauka sada nyawa ari Hillary.
“Arapka penatai lagu solo Ngiga Palan Penyangkai tu ulih ngubat pengelengau peminat.
“Aku nemu tebal sida ba luar dedin lama udah nganti mega chukup lelengau ke asil keranjai ari aku.
“Minta ampun laban chukup lama udah enda ngeluarka sebarang lagu iya nya pengelama 12 taun.
“Kebendar dalam timpuh 12 taun nya aku begulai enggau raban Band Kumang Malaysia seruran merindang mensia mayuh ba bemacham pengerami, nitihka peminta.
“Kelimpah ari nya, aku mega chukup kiruh nyadi pengatur muzik, nengkebang tiun enggau leka lagu ungkup penanyi bukai,”ku iya madah ngagai Ruai, Suara Sarawak.
Ungkup penemu, Hillary sebedau tu kala tebilang enggau Lagu Kumang Malaysia dikeluarika serikat Golden Pearl Recording Studio ba taun 2009.
LAGU BARU
Nerang silik pasal lagu Ngiga Palan Penyangkai, Hillary madah lagu tu nyeritaka dua iku bujang enggau dara ti puntan dalam pengerindu, beserara ukai ketegal laya tang endang nadai nasit panjai begulai enggau pangan diri.
Taja pia seduai tetap ulih segulai taja badu bepangan nyentukka indu nya bulih ganti baru lalu lelaki nya pan kekapa ngiga palan penyangkai ke baru.
“Tu semina cherita dalam lagu lalu nadai ngaul pekara ti nyadi ba pengidup siku-siku ba dunya nyata,”ku iya.
Ngelansa pasal Band Kumang Malaysia, Hillary madah mayuh langgur pengawa raban band sida iya diatu tejanggal ketegal pengerekai pandemik Covid-19.
Bepun ari siti band ti mit ditumbuh 2013 sereta enda dikelala diatu band sida nya udah mayuh dikelala mensia mayuh taja pan suah betukar raban.
“Puji Tuhan, manggai 7 taun umur Band Kumang Malaysia tu udah beretan nyentuk sehari tu,”ku iya.
Nangkan ke nya, iya madah diri benung ngiga barang sapa ti deka ngerikod lagu tauka penanyi dibaruh perabung Kumang Malaysia Muzik Production.
Entara penanyi bukai bisi dalam Channel Youtube Kumang Malaysia iya nya Ukai Enda Sayau disadaka Richard Lee, Lari Ke Janji (Marky Andyson), Nuan Berulah (Stella N), Nadai Ubat Penawar Rindu (Max Alvin) enggau Ngingatka Nuan (Dull Khan).
Mensia mayuh ti deka begunaka servis band ari Kumang Malaysia tu ulih betelefon terus nuju lumur 0 19-885 8060, ku Hillary.
