Hope Place ngemerat pengelikun raban ke dijaga

KUCHING: Hope Place Kuching seruran sedia mantu enggau nyendiaka servis ngagai raban ti tusah.

Pemungkal iya, Kelvin Wan madah, sekumbang timpuh Atur Tagang Pejalai Penyuman (PKPP) tu, Hope Place fokus nentuka semua ruang bilik diibun sida semampai dijaga manah enggau beraka pengelikun sida ti tusah.

Ku iya, bepun PKPP tu, Hope Place diatu mega deka nyuaka sabun digaga sida empu enggau sengkabung mua ungkup semua ti dijaga sida kelimpah nyuaka bantu pemakai enggau barang khas ngagai sida ti nyelai pendiau enggau sakit.

“Hope Solution “Solution For Life”nya sebuah projek kerejasama enggau Hilton Kuching sereta Eco Lab udah ngena baru enggau ngasilka mayuh sabun digaga sida empu kenyau ari taun nyin kemari.

Hope Place deka nyuaka mayuh sabun ngagai semua penerima sida.

“Sengkabung mua ti udah diberi Affin Hwang Asset Management Berhad mega deka diberi ngagai raban ti tusah ke alai dua kutak sengkabung mua deka disadung ngagai genap ruang bilik.

“Kami ngarap lebuh meri sabun enggau sengkabung mua tu, sida ti tusah deka beresi enggau likun agi,” terang Kelvin.

Ngena peluang tu, Hope Place deka meri besai terima kasih ngagai semua sida ti udah melanja baka Hilton Kuching enggau Affin Hwang sereta semua sida ti udah gerah jari seruran mantu komuniti ti tusah di Kuching tu.

Diatu Hope Place enda nerima sebarang utai ke udah dikena laban perintah agi bejalaika PKPP.