HPV pun penyadi riman pun sarang anak

KUCHING: Riman pun sarang anak tauka bepun ari penyakit berampit dikumbai ‘Human Papilloma Virus’ (HPV).

Presiden Pink & Teal EmpowHer, Dr Abigail Jerip madah indu ti udu beleman bisi peluang besai kena HPV lalu sida tu mega bisi risiko kena riman pun sarang anak.

“Urung 90 peratus kes riman pun sarang anak ti nyadi ba orang indu tu ketegal ari igi penyakit HPV.

“Indu udu beleman enggau siku tauka mayuh lelaki sigi bisi peluang kena rampit igi penyakir tu,” ku Abigail.

Iya madah nya lebuh dirandau ba pengawa bejadika kimpin “Sigek Kitak, Sigek Kamek” ba siti palan meli barang ti tebilang menua tu, kemari.

Dr Abigail madah riman tu nyerang orang indu nengah chara beleman, udu betukar pangan enggau beleman, beranak ba umur ti kelalu biak sereta rampit jangkitan HPV.

“Riman tu ulih nuntung orang indu ti udu beleman, suah nukar orang enggau beleman, bisi anak lebuh umur agi biak sereta rampit HPV.

“Semua orang indu ti kala beleman patut beperesa pengerai nengah peresa pap smear, peresa HPV sereta ke bukai ngambika ulih meda pengerai pun sarang anak sida,” ku iya.

Abigail nangkan orang indu ti chakah sereta kala beleman patut beperesa ngambika kelai tumu penyakit tu ulih dipansik sereta ulih ditagang nyadi raya.

MESETI BEPERESA… Abigail (tengah) begulai enggau Fatimah sereta bala bukai begambar kenang pengudah tembu program kimpin ‘Sigek Kitak, Sigek Kamek’ ke diatur di Kuching kemari.

Suara Sarawak