KUCHING: Kolej Universiti i-CATS (i-CATS) gaga nanggam kerejasama enggau palan pelajar tinggi di China.
Mandal Chansilor i-CATS, Profesor Dr Shahren Ahmad Zaidi Adruce madah, i-CATS ulih ngatur program nitih atur tikas sebaka enggau pejalai program palan pelajar tinggi di China.
“Nengah kerejasama tu, kitai ulih bekunsi penau akademik, bejalaika pansik timbal lalu begulai ngasilka jurnal ti nyulut.
“Nya alai, kitai ngarap i-CATS diaku enggau diberi akreditasyen ari Opis Menteri Pelajar China.
“Pengawa ngaku tu ulih meri peluang ngagai palan pelajar tinggi tu muka pintu ngagai nembiak China kelimpah negap kaul enggau menua kitai,” ku iya.
Dr Shahren mansutka jaku nya rambau ngelalu penemuai basa Duta Besai Republik Rayat China ke Malaysia, Ouyang Yujing ngagai i-CATS ba Jalai Stampin Timur ditu, sehari tu.
Dikena nyapai juluk nya, Dr Shahren madah, kolej palan pelajar tinggi nya enda masau jam dikena nyendia pakej khas ungkup pelajar China ti deka ngambi nyereta program i-CATS.
“Taja pen kitai mit tang kitai ngembuan ati ti lurus enggau temegah nyaga nembiak lalu matih sida nyadi tuai ba semua sukut.
“Ari nya, kami ba i-CATS ngelalu sereta nerima penemuai nembiak ari China ti nyadi nembiak pelajar penuh tauka ngaul ba timpuh pandak,” ku iya.
