Ibun manah keresa lama

“…lalau aku enti ulih anang muai kereban nya, beri ngagai endur ke begunaka kereban nya laban nya mayuh tuju ke jemah ila,”

BETONG: Komuniti Iban patut ngembuan siti shelter tauka endur siti dikena nyimpan keresa lama.

Kaban Parlimen Kapit Datuk Alexander Nanta Linggi madahka pekara nya beguna bendar ngambika kereban nya ulih disimpan enggau manah.

“Endang mayuh kitai ninga tusi pasal keresa lama ke dibuai ketegal pengarap baru lalu pengudah bisi pengarap baru, pengawa lama nya ditinggal magang.

“Tang lalau aku enti ulih anang muai kereban nya, beri ngagai endur ke begunaka kereban nya laban nya mayuh tuju ke jemah ila,” ku iya.

IBUN MANAH… NANTA madahka kitai patut ngembuan siti shelter tauka endur siti dikena nyimpan kereban lama.

Nanta madah munyi nya lebuh nyaut tanya siku penyereta Simposium Ngepan Iban (SNI) 2019 di Kompleks Opis Perintah Nengeri ditu, kemari.

Nangkan nya ku iya, endur nya ulih dibuka ba palan ti ngemeranka pekara ngaul bansa Iban baka Tun Jugah Foundation.

“Lebuh kereban lama ke dikumbai berantu nya tadi disimpan ba endur tu, barang sapa deka beguna ke iya ulih minjau ari sida tu.

“Ambika chunto baka tawak sereta tajau lama ulih dipeda nembiak rebak baru ke enda kala meda kereban nya,” ku iya madah.

Kelimpah ari nya, Nanta ti ngemataka randau nya madahka semua pekara ti ngaul komuniti Iban baik nya adat, jaku tauka ngepan patut digaga sistematik sereta diengkah ba arkib.

“Kebuah pia ngambika bisi endur ke ulih ngibun semua dokumen sereta pekara ngaul bansai kitai.

“Diatu, mayuh udah dipeda aku ke alai orang udah rinduka pengawa ngaul adat enggau pekara lama bansa kitai.. .ambika chunto baka gagung,” ku iya nambah.

Berebak enggau nya, Sekretari Politik Kepala Menteri tu ti mega nyadi Ketuai Indu Parti Rayat Sarawak (PRS) ke mega nyadi siku kaban randau nya Datuk Seri Doris Sophia Brodie madahka kereban lama enda patut ditempaya sengapa.

“Enti amai kereban nya ditemu kitai berantu, enda salah kitai ngangauka paderi.. laban kitai endang bisi pengarap,” ku iya madah.

Rambau SNI nya mega, Sapit Menteri Kaunsil Kandang Menua enggau Pengawa Berumah ti mega nyadi Adun Marudi mega siku ari kaban ngemujur SNI 2019 Datuk Dr Penguang Manggil meri RM5,000 ngagai piak komiti pengatur dikena sida bejalaika simposium nya.

PENALIS RANDAU SNI… Ari Kiba: Doris, Penguang, Chairman Tun Jugah Foundation Tan Sri Datuk Amar Leonard Linggi Jugah, sereta moderator randau Pengelicha Palan Pematih Pengajar (IPG) Rajang Dr Lambat Lindong ba randau SNI 2019 ditu.